ORANJESTAD (AAN): Manera ta conoci, durante henter luna di September, Wit Gele Kruis Aruba tin e conocido ‘Curso Futuro Mayor’,
pa asina tur mama y tata nobo haya tur informacion relevante awor cu nan ta bira mayor pa prome biaha. Di e forma aki e curso aki ta yuda nan prepara pa nan aventura di mas bunita cu ta na caminda.
E cursonan a wordo duna den e fenomenal ‘Aula di Lama’ cu ta un espacio di les special na JOIA Aruba by Iberostar na Eagle Beach. Tabatin ocho sesion, cu e.o. informacion di Partera, asunto di Preparacion pa Parto, informacion di Lechi di Pecho, encuanto Salud Oral, Tienda di Educacion, y mas.
Tambe tabatin e sesion duna pa experto Lusheska Maduro di Fundacion Pa Nos Muchanan. E dama hoben y na un forma preciso a trece dilanti e detaye primordial, cu desaroyo di mucha ta cuminsa for di prome dia. Nan a enfoca e sesion interactivo tocante desaroyo di mucha di 0–2 aña y con pa scohe un centro di cuido.
Hunto cu e participantenan, nan a intercambia experiencianan, pensa riba comportacionnan di baby y mucha chikito, y conversa tocante con nos por stimula nan desaroyo den bida diario. Fundacion Pa Nos Muchanan y Lusheska Maduro ta duna danki na Wit Gele Kruis pa e invitacion y na tur participante pa nan participacion activo.
