ORANJESTAD (AAN): Recientemente un situacion espantoso a presenta su mes na Holiday Inn Resort na Aruba,
ora cu un waya di coriente a pega candela den e blafon riba e Drugstore cu tin den e lobby.
Loke kizas por a bira un situacion hopi mas serio, toch a wordo controla rapidamente danki na e pensamento rapido, y curashi di Arcenio Murray, kende e momento ey tabata ‘Manager on Duty’.
Sin pensa dos biaha, Arcenio a core drenta accion, y sa unda pa pasa man pa un aparato pa paga candela. Cu e fire extinguisher aki den su man, el a bay y paga e candela chikito aki prome cu el a haya chens di plama y ocasiona daño mas extenso.
Su reaccion sereno, cu actuacion rapido y su disponibilidad pa actua ora cu mas tin mester, a evita cu e lo por a bira un incidente mucho mas grave. Aki bo ta mira cu un heroe semper ta djis mira un problema, y ta asumi responsabilidad y actua.
Special pa esaki, nan a otorga un Reconocemento na Arcenio, y asina a gradici’e pa su reaccion y dedicacion rapido. Su accion a haci un diferencia grandi, y Holiday Inn Aruba ta agradecido cu nan tin’e como parti di nan team.
