ORANJESTAD (AAN): Ateliers '89 Punto Di Beyas Arte Aruba, tin e honor y placer di invita bo persona pa e apertura di su exposicion titula "Time After Dark",
Diahuebs 1 di October pa 7:00 pm. Den salanan mayor na Ateliers '89.
Cu presentacion di e obranan di arte di fotografia cu partisipacion di e artistanan; Naomi Nicholson, Giselle Fingal, Kenzo Rodjan, Iveta van Veen, Marlene van Blarcum, Sunil Bhintade, Meliza Lopez, Christian Celis-Peloschi, Michael Naar.
Durante e luna di September, e maestro artista Fernando Vermeer a sa di comparti su experticio den fotografia cu tur su alumnonan participante, den e Black Box na Ateliers '89. Dunando asina un workshop unico di fotografia den scuridad.
E workshop aki diferente y importante na unda a siña e tecnicanan necesario pa saca potret anochi o den scuridad. No tabata nada facil pa e participante bolbe actualisa maneho di nan camera y e tecnicanan necesario pa haci esaki bon. Sinembargo a sa di disfruta tur anochi di e workshop en grande. Pa asina cada un riba nan mes por a crea un o mas obra di arte den fotografia, bou di e guia di su excelente maestro artista fotografo.
Pesey mes e exposicion aki lo ta uno hopi interesante mes. Unda Ateliers '89 ta facilita bo e posibilidad unico pa bo bin mira e resultado di cada un di e participantenan cu e potretnan cu a wordo escohi pa ser expone durante e anochi aki di apertura.
Tambe durante e exposicion aki na Ateliers '89, por mira e obranan di arte den nos, White Box. Di e diferente artistanan invita manera; Enrita Werleman cu picassiette mosaic, Miriam de L'Isle cu pintura, Glenda Heyliger cu instalacion, King Lie Kwie cu su pinturanan.
Asina nos kier a termina bisando un danki grandi na tur e instansianan cu ta haci nos exposicionnan posibel: H&H Fine Wine and Spirits, Cultuur Fonds Caribe, Checkpoint Color y Gobierno Aruba. Bin mira e exposicion aki unda bo presencia lo ta altamete aprecia y asina engrandese nos arte contemporaneo y cultura di bo pais Aruba
