Fundacion Pa Nos Comunidad ta bezig cu su proyecto “Comparti Felicidad”

*E ta consisti di un “Donation Box” cu ta un aguinaldo di bon boluntad

ORANJESTAD (AAN) – Gabriel Marchena, Trahado Social di Fundacion pa Nos Comunidad, den entrevista cu DIARIO a señala cu e fundacion ta den full swing, cu su proyecto “Comparti Felicidad”, cu un aguinaldo di bon boluntad.

Esaki ta encera mas tanto un “Donation Box” cu e fundacion a pone na diferente localidad rond di Aruba, y den supermercadonan cu ta yuda e proyecto, di tal forma cu cada cliente cu ta haci compra, por aporta productonan basico (aroz, pasta, cuminda den bleki) por deposita esaki di biaha den e “donation box”.

“Asina nos tin contacto cu e companianan cu tin e donation box semanalmente nos ta busca esaki, di tal forma cu nos no tin cu warda te ora e yena, pa tin espacio pa sigui colecta e donacion”, Marchena a menciona.

E productonan mas primordial cu FPNC kier colecta ta aroz, pasta, vegetalnan den bleki y lechi cu ta esencial, y tambe bonchi, y por pensa tambe riba harina pan cu ta hopi importante. Semper, den temporada di Pasco tin hendenan cu ta pone algo extra, y cualkier donacion extra e fundacion lo agrega esaki na e pakete. Marchena a comenta cu e ta depende tambe di e establecimento kico nan kier duna, y di e clientenan. “Locual ta sali di nan curazon pa duna, e ta yuda. Cornflakes tambe ta bon bini, di tal forma cu nos por hink’e den e pakete haci’e mas amplio”, Gabriel Marchena a indica.

Tambe FPNC tin un “money box” disponible na diferente otro localidad, di tal forma cu nan por aporta di biaha. Nan a crea un flyer cu informacion con e cliente por transferi placa na cuenta di e fundacion, numbernan di banco, pero tambe informacion di e proyecto aki mes y otro proyectonan y informacion en general.