ORANJESTAD (AAN): Fundacion Movimento Ta Bida a acerca Aqua Windies pa hunto planea algo pa nan miembronan.
Aqua Windies ta un centro di fitness aquatico y di scuba diving, cu tin nan mesun piscina di tamaño olimpico, cerca di area di Hospital na Eagle Beach.
Den un entrevista cu Rosa Leon di Fundacion Movimento Ta Bida (FMTB), a bisa cu nan lo bay ofrece dos programa, esta ‘Aqua Fit’ y tambe ‘Aqua Cycle’ cu ta bay cuminza otro siman cune.
E training den awa ta yuda tur hende cu tin problema un tiki cu mobilidad. Ora bo curpa ta den awa, ta conoci cu e peso riba bo pianan ta bira menos, e presion ta bira menos, y tin adultonan mayor cu tin problema cu rudia y lomba. Nan kier motiva nan pa uni cu e programa aki, unda bo lo pone menos presion riba bo joints y bo curpa, y aki e ora bo por goza di contacto social, cu ta dunabo chens di conoce personanan nobo, mientras bo ta haciendo ehercicio tambe.
E asina yama “Proyecto Hunto Grandi” aki ta wordo organiza pa prome biaha, y e programanan mes ta existi caba, pero kier djis hala atencion di adultonan mayor pa nan sa cu e ta safe, ta OK, y ta algo full diferente pa nan haci.
Segun Rosa Leon, movimento pa tur hende ta importante, incluyendo pa hende grandi, y mas grandi nos bira, ta haya cuminza topa cu tur malestarnan cu e edad ta trece cune, pero unavez cu bo keda den movimento, esey lo yudabo minimaliza tur dolor cu lo bo por tin.
E interes di nos personanan di edad ta grandi, y esaki ta algo cu e Fundacion a bin ta ripara. Principalmente ora cu nan bin cu proyectonan nobo, por nota con mesora nan kier participa, como cu nan ta curioso pa sa con e training aki lo bay ta. Esey ta exactamente loke e Fundacion ta desea tambe.
“Nos kier pa nan tin e curiosidad entre nan, pa asina nan haya e interes y bin join e proyecto pa nan mira cu e ta algo dushi pa haci,” Leon a indica.
E meta di cada programa cu Fundacion FMTB ta presenta ta pa motiva otro instancianan, pasobra si tur traha hunto, bo por crea un actividad rond di henter Aruba, y no enfoca djis riba un solo fundacion. Pero esey ta e enfoque principal cu nos tin, pues ban traha nos tur hunto y cu e meta principal pa yuda tur esnan di adulto mayor riba e isla.
Fundacion Movimento Ta Bida ta activo den seis diferente bario unda cu cada uno ta independiente. Loke nan ta purba di haci ta pa incentiva mas hende pa cuminza move nan curpa mas. E Fundacion ta hasta duna yudanza pa hendenan lanta nan mesun grupo, y esey ta un di e metanan cu nan tin.
Si bo tin grupo di 10 adulto mayor cu hunto kier cuminza entrena, pero no sa con pa haci esey. Bo por acudi na e Fundacion FMTB y nan lo dunabo tur indicacion con pa cuminza cu ne.
Pa awor, e “Proyecto Hunto Grandi” cu nan lo tene cu Aqua Windies tin cupo maximo pa 15 persona, pero mas den aña nan lo bay ofrece mas ciclo di e programa aki. Nan tin un pagina riba Facebook cu tin mas detaye.
