Fundacion Movimento ta Bida a brinda tres tayer hopi exitoso na personal di SVGA

Rudy Leysner Presidente, satisfecho:

ORANJESTAD (AAN) – Dialuna 17, tabata un dia importante y exitoso unda SVGA a participa den tres tayer duna pa Fundacion Movimento ta Bida.

Den entrevista cu DIARIO, Rudy Leysner, Presidente di Fundacion Movimento ta Bida, a duna di conoce cu e personal di Stichting voor Verstandelijk Gehandicapten (SVGA) a puntra si nan por organiza tres tayer riba tres tema cu tabata: Nutricion, unda nan a haya ayudo di IBiSA, POH y DVG. Salud Mental cu cooperacion di Departamento di Asunto Social, y e parti di “Active Aging” den cual Movimento ta Bida ta experto den dje.

A participa 91 hende di SVGA cu a haya un dia completo, den diferente grupo, pa haya e conocimentonan comparti den e tayernan.

SVGA a atende e Congreso CAAC (Caribbean Active Aging Congress) organiza pa Fundacion Movimento ta Bida, na November aña pasa, unda nan a saca afo kico nan falta como SVGA duna un miho servicio. Nan a capta na unda e personal mester di mas apoyo, ayudo of informacion y e parti di nutricion ta hopi importante y SVGA kier a sa mas tocante un dieta balansa, etc. Pa loke ta trata “Active Aging” (embehecemento activo), e enfoke ta pa e hendenan prepara no solamente ora nan yega 60  aña y mas pero pa henter bida. Ya for di 30 aña di edad caba, mester cuminza ta alerta y prepara pa ora bira mas grandi, y yega na edad di pension.

Movimento ta Bida a duna hopi informacion tocante esaki, y tambe e aspecto mental. Esaki ta bin na ultimo momento cu hende ta keha di stress na trabao, na cas, etc., y mester sa con pa anda cune. Esey ta e tres puntonan cardinal riba cualnan Stichting Voor Verstandelijk Gehandicapten kier tabata mas informa pa su personal cu ta consisti di seis seccion.

Leysner a subraya cu e personal mester ta bon prepara pa duna cuido na otro, pasobra si no, ta dificil pa pasa informacionnan pa otro, pasobra bo no tin e conocemento. Bo mester haya conocemento en general pa asina pase over na esnan pa kendenan bo ta duna cuido.

Leysner a menciona, pa loke ta envehecemento, cu esaki no ta cay solamente pa personanan normal, pero tambe pa esnan special. E ta kere cu e personal di SVGA tambe ta wak cu nan clientenan ta birando mas grandi y nan mester di mas ayudo y extra cuido.

Finalmente, Rudy Leysner a expresa cu e persona ta cuminza prepara su mes basta jong, y no warda te na ultimo pa haya informacion, of pa cuida curpa; e parti di actividad fisico, nutricion y di salud mental, ta e tres factornan hopi importante pa henter bida, y mester prepara pa yega na un edad grandi, saludable.