Rudy Leysner Presidente
ORANJESTAD (AAN): Un bon noticia pa habri 2024 ta cu Fundacion Movemiento ta Bida ta bay inicia cu nan proyecto caminda nan lo bay den barionan cu 'Fysio Fit'.
Rudy Leysner, Presidente di e fundacion a duna di conoce cu entrante awe 8 di Januari nan ta inicia cu 'Fysio Fit' 60+ diferente Centro di Bario como tambe YMCA caminda Fisioterapista Ivonne Andrade lo yuda cu esaki. E lo ta tur dia mainta y atardi.
Esaki ta un programa special di ehercicio di fisioterapia specificamente pa personanan di mas di 60 aña.
Leysner a agrega cu ta constata cu ora hende ta bira grandi nan mester ta mas independiente y tambe biba mas largo. Pesey e fundacion ta traha riba e parti di prevencion.
Hende tambe kier tin contacto cu hende y cu e programanan aki ta bay mira con por mehora e programanan y tambe yuda mas den e barionan, a bisa.
Ta focus aworaki riba e adulto mayor, di 60 plus, cu por atende e programa mainta of atardi, den e barionan mes cu participacion di esnan cu ta menos activo.
A dividi e actividad den tres ora caminda ta bay yuda esnan cu ta activo caba, esunnan cu ta menos activo y esnan cu mester di asistencia special pa asina mehora nan calidad di bida tambe.
Ta bay traha den tur e aspectonan caminda por mehora e calidad di bida di e hendenan grandi .
Rudy Leysner a laga sa cu e personanan interesa por registra den nan bario, y via e fisioterapista mes. Tambe por yama 586-8651.
Cada 10 pa 12 siman lo evalua y asina ta bay sigui henter aña, Leysner a bisa.
