Ora di lanza su tres bukinan
ORANJESTAD (AAN): Tabata como 15 aña pasa, cu Juby Naar a wordo honra na seccion Arubiana Caribiana di Biblioteca Nacional, ora cu el a lansa su tres bukinan chikito na Papiamento.
E anochi aki, e conocido poëta Ruthy Vrieswijk-Bergen, a haya chens di bay na mic pa asina dirigi palabranan di honor cu el a skirbi pa Juby Naar. Ruthy ta haya satisfaccion, cu toch el a logra di demostra honor y aprecio pa e conocemento di Juby, durante cu e tabata na bida.
For di Ruthy, DIARIO a ricibi copia di e palabranan cu el a usa e anochi ey, esta Maart 2009, pa publico lesa esaki:
PA JUBY NAAR
DI RUTHY
(Maart 2009)
Pa mi ta un placer comparti algo di nos amigo Juby, y mi ta contento cu niun hende a bisami awe nochi pa “no papia di mas” of “pa ten’e cortico” - Mi ta kere cu Juby ta haci asina hopi ariba varios tereno, cu ni maske mi a yena dos papel A4, ainda e ta poco. Y no ta ami so ta esun cu lo papia cosnan bon y bunita di Juby.
Lagami menciona for di cuminsamento, cu mi no ta compananzi ni famia di compananzi, cu ta gusta haci cosnan na su bienestar of su favor, pa cualkier posicion, puesto of titulo (Bon, cu excepcion si bo invita mi bay come, pasobra mi no ta gusta cushina!)
Mi ta laga tur otro cos un banda pa bay yena e stoma un crenchi, y ta horcan cu pasa so por strobami di sali bay come! Kiermen, mi ta un version femenino chikito toch di Nanzi, kizas mi por yama mi mes: Nanza. (Ora mi tin mi baret di color cora of blauw bisti, nan sa puntrami si mi ta un fanatico di Chavez, pero mi ta bisa nan cu mi por ta un version femenino cu e nomber : Cha-visa.... si, cu buraco den mi man pa usa mi visa card ora mi biaha.
Juby, bo ta wak. No tin hopi hende ta hari, ta abo so por bin cu cosnan mas humoristico ora bo ta dirigi bo mes na un publico.
Awenochi palabranan lo resalta cu elogio y aprecio y amor, den algo pa un bon brother di mi di curazon, aunke su edad ta casi yega plafon, y ami ta bisti shimis y e ta bista carson! Un algo di su talentonan y bendicion pa sigui alegra e curason!
Un anochi di literatura na papiamento, dedica na nos amigo Juby Naar.
Juby su curazon ta lombra, e ta grawata, e ta kishiki di contento, e sa, cu el a tuma un bon decision. Pa skirbi Storianan y cuentanan gracioso na monton! Anto con!
Ta ken aki na Aruba no conose Juby Naar? Segun mi, e no sa ni mes, kico ta un bar! Mi no a topele nunca cu un botter di cerbez of glas di biña den su man... ta bloknoot cu pen ta su maleta cu e ta hiba cu ne tur caminda cu nan invit’e. Anto, den detaye y hopi biaha na color, e ta describi y gaba y of critica constructivamente nos talentonan local ariba tur tereno den su seccionnan den Diario.
(Bon, cu exepcion di mi buki “Mi bida den un dia....den silencio” (Lagi ta frega). Ainda mi ta sinta warda, mientras mi ta conta mi cabeynan blanco. Mi tin tempo, ta awor numa mi ta na mitar caminda di mi bida! El a lesa e prome parti si.
Keremi, ora mi bisa boso, cu mi tambe sa con dushi ta pa tende cu locual bo a skirbi of haci a cay na agrado y a alegra mas curason, esey ta sinti, pasobra hopi biaha mi a haya bon compliment cerca hende, despues di a skirbi y of recita un poema. Pero danki Dios mi casa Johan, ta para net banda di mi y ta percura pa mi baha for di mi nubianan na ora. Pa mi no keda pega ta zweef cu cabez hincha demasiado largo. Pero awe nochi un otro color di biento den 3 gota pa dia ta ranca sali den forma di un “abrenuncia” y un stem chikito ta grita den mi curazon “Oh My God”, danki cu mi por tabata un otro instrumento pa bo, den e forma aki y comparti di curazon, algo dushi di e tremendo escritor aki, cu a haci mil y un cos mas cu mi , den su bida. Bon, mi no sa si e tambe tabata un lider scout of cu el a yega di canta cu Tino Ruiz of Trio Los Arubenos.
Y awenochi, abrenuncianan lo skeiro den diferente idioma manera “Oh me goedoe, Mi shon, Hesuse, ora nan cuminsa lesa e tres bukinan di nos amigo Juby Naar.
Na edad hoben Juby a drenta e mundo exitante emocionante di Teatro y Carnaval. Despues di un estudio, Radio y Television a bira su ramo especial, pero no a traha mucho largo den esakinan. Nan di, cu ami no por mira un microfon, pero, keremi, Juby tin 52 aña caba ta cana cu microfon den boca riba diamars na Bon Bini Festival y of den fin di siman! E ta papia bay goal, pone e turistanan hari y riba dje, bati man! E joke di holoshi den e camber na hotel cu e kier bay coi.
Awenochi, un anochi di boa, cu ta gusta come chopsoy cu speed di un morocoy.
Su otro bukinan ya publica, tocante e dia di San Juan, E segundo paraiso, cu na caminda mas buki cu mas informacion tocante Dera Gai, y Parha di Lona.....pa sigui papia di De Vuyst.
Juby a yega di contami cu e tabata practica hopi deporte den teamnan hunto cu dos tio masha stima y aprecia di mi, Joy Bergen (actualmente activo como umpire den Little League ) y Freddy Bergen, awe dfm, pero ta na unda tur e curpa di atleta di Juby a keda anto? Di toothpick el a cana bay, sigui subi di peso na caminda, su schouder a cuminsa bira pisa, di tanto cos cu e kier haci, pa porfin yega na e tienda di Benjo Pick, conosi como Chipi-chipi, pa a reemplaza su uniformnan di deporte pa wayaberonan 3XL, y dorna cu “abrenuncianan color di biento den 3 gota di palabra “....un di nan ta sac - no, no sak bay abao, si e sak bay abao e ta keda plat plat. Mi ta purba bo sa, tin biaha mi ta kere cu mi tambe por ta un sorto di payaso pero mi ta mucho serio!
Pero esey ta algo cu nos amigo Juby ta hopi bon den dje, ora e ta un tremendo maestro di ceremonia den un Cas di Cultura completamente yen, anto e ta bin cu su remarcanan gracioso, pone tur hende hari. Algun aña pasa, Juan Chabaya Lampe, Padu del Caribe, si, Padu, nos tata di cultura y ami, como Lady Ruth, a dedica un di e festivalnan di Bon Bini na Juby mes, sin cu e sa, nos a tuma over, pidi e microfon y den forma simpel pero di curazon a entrega Juby un bunita cuadra di Padu, mientras ami a recita un bunita poema pe di curazon. Y mi a conta en breve na e turistanan ken ta Juby Naar, kico asina e ta haci pa Aruba.
Awe, den 2009, Sr. Hubert “Juby Naar” ta tene regularmente charlanan na diferente schoolnan y klasnan na Aruba y constantemente su oficina na Diario ta yen di mucha cu kier bishit’e y papia cun’e, anto, pa despues e keha cu e tin cu traha te den oranan laat di anochi, ta e mes gusta!
Juby a ricibi varios homenahe y reconocimento for di diferente gruponan di baile y di teatro y tambe di musica. Y awenochi Juby ta e centro di atencion cu e publicacion di tres buki pareu..... despues di a cana (un caminda di cruz) manera un cangreu, purba piki pieu aki aya pa faya pa bo haya, of ta haya pa bo faya, of ta storianan di su yaya, despues di a bula waya!
Mi ta pidi boso tur awor.....un aplauso pa un persona talentoso cu no ta tapa boca pa nada, E sa cu su djentenan no lo cay asina lihe. E por defende su mes bon.
Juby, mi pabien cu bo tres bukinan nobo. Di curason, God bless. You did your best and God did the rest. El a pone e direccion di biento, bula den e direccionnan necesario pa e tres gotanan pa dia, sigui yena nos dushi Aruba cu hopi alegria, den e gritonan yen di energia “Ta Juby mes” Ta Juby mes, Ta Juby mes.. Holoooooo! Ata baina ‘ki!
