Fundacion Movemento ta Bida Song Festival y fiesta bailabel diadomingo proximo

ORANJESTAD (AAN): E comision organisador di e Song Festival 60+ y su fiesta bailabel di diadomingo 17 di November venidero,

a tene reunion siman pasa den preparacion cu e cantantenan pa asina comunica e programa y reglanan pa cu e anochi aki.

            E aña aki tin 2 cantante invita y 18 participante cu un variacion grandi den cantica y estilo.

            E banda musical cu lo acompaña e cantantenan ta “Nos cu Nos” bou direccion di Sr. Igor Hasham y Dirigente di Banda y cantantenan ta Sr. Roy Sneek. E otro 2 bandanan musical ta The Kiwanis Band y We & We.

            Fundacion Movemento ta Bida ta recorda cu e Song festival ta cuminsa 4:00 te cu 7:00 pm y despues e fiesta bailabel te sigui te cu 10 pm. Esaki ta tuma luga na Renaissance Convention Center. Porta ta habri 3pm y ta avisa tur persona cu tin carchi di entrada cu riba e mesun atardi aki lo tin actividadnan di Sinterklaas na e Seaport Market Place. Planea pa yega na tempo. Parkeer auto lo bira dificil. Busca un persona pa transporta bo y buscabo of haci carpooling.

            E Song Festival aki ta un fundraising annual pa inverti bek den proyectonan di Fundacion Movemento ta bida cu tur aña cu ta ripiti.  

            E grupo di adulto mayor na Aruba ta creciendo enormemente. Check nan Facebook page Fundacion Movemento ta Bida pa keda informa di tur nan eventonan, proyectonan y mucho mas.