Base pa e exigencianan mas grandi di democracia a wordo logra
*Bon maneho di placa ta resulta den alivio social pa tur Arubiano
*Na 2024 Aruba tin placa pa Dande y pa reconstrui base di bida
ORANJESTAD (AAN) —Siete Punto di Prioridad. Esaki ta e contenido di e programa di trabou cu partido MEP ta ofrece na Pueblo di Aruba na caminda pa eleccion.
Ora Aruba na final di 2024 acudi na urna electoral, e sistema di democracia ta alcansa su punto mas importante pasobra Aruba ta dicidi kico e kier pa su futuro y kende e kier pa maneha su pais.
Na un momento historico Aruba ta bay urna electoral.
Ora haci e declaracion aki, no solamente ta mira e situacion mundial cu ta exigi pa gobernantenan di awe y futuro ta expertonan riba nan tereno y capaz na dirigi Pueblo den temponan mundial sumamente dificil.
E factor principal directo pa Aruba ta keda cu Aruba ta bay dicidi pa su futuro politico, na momento cu Pueblo di Aruba a alcansa uno di e logronan mas grandi cu democracia ta encera.
Ora papia di logro of fayo di un pais cu ta wordo dirigi a base di democracia, ta papia di e resultadonan di e trabou cu ta wordo haci dor di gobernantenan cu Pueblo ta eligi pa percura pa bon funcionamento di un pais.
Pa comprende e tarea grandi di gobernacion, mester bati na porta di un empresa cu tin cantidad di trahador y cliente y mester di hefenan capacita pa e compania por funciona.
Cu proceso di eleccion, e Pueblo di Aruba ta vota pa e paisnan cu lo dicidi kico mester pasa na e pais pa sirbi bienestar di henter e comunidad, sin excepcion di ningun grupo ni ningun persona.
Aruba na e momentonan aki lo mester dicidi si e kier despedi di uno di e mihor gobernacionnan cu el a conoce den su historia for di 2017 ora e Prome Gobierno Evelyn Wever-Croes a asumi poder na momento cu Aruba tabata den un crisis total.
Ora bolbe na tur documentonan oficial di Gobierno, di Hulanda, di organisacionnan local di gremionan, ta topa cu declaracionnan clave, cu ta dificil hasta pa a pronostica e futuro di Aruba cu tabata den un desastre financiero total.
Ta na e momento crucial aki, Aruba a conoce entrada di un experto financiero excepcional cu ta mr. Xiomara Maduro, cu a cuminsa dirigi e situacion di placa di Aruba.
Na un momento decisivo pa Aruba, cu manera Hulanda mes a bisa a keda na 2017 den estado di bancarota, Aruba a conoce e entrada di un Prome Ministro, mr. Evelyn Wever-Croes riba tereno fiscal y financiero y otro experto den persona di mr. Xiomara Maduro.
Ora papia di experto financiero, nos ta papia di personanan cu pafor di e trabou di Gobierno pues den mundo empresarial, lo a cobra sumanan enorme a base di salario debi na nan capacidad di experto, pa resolve problemanan manera nan mester resolve na Aruba.
Pa para keto awe na mr. Xiomara Maduro, mester admiti cu Aruba a haya un Yiu di Tera, un experto Arubano, cu como experto por a traha hasta pa Hulanda y cualkier otro pais na mundo cu ta den problema financiero.
Ministro mr. Xiomara Maduro na un forma magico, cu solamente conocemento di e materia ta hacu posibel, a cambia e panorama financiero di Aruba completamente.
Si Aruba tabata tin un caha di placa sin bom y contenido, na un forma dirigi di acuerdo cu reglanan estricto di Reino tambe, e experto local mr. Xiomara Maduro a saca Aruba for di e poz di traha a base di debe cu Mike Eman a crea, pa Aruba funciona cu e base saludabel cu tur hende, tur familia, tur organisacion y empresa mester pa por funciona na forma saludabel.
Awe, mientras mundo ta pasa den momentonan sumamente dificil, trabou di mr. Xiomara Maduro ta haci cu tin placa pa Aruba por cuminsa traha directamente na e fundeshi di bida di cada ciudadano.
Esaki ta encera cu awor Aruba tin e base pa construi mas cas pa Pueblo. Pa mehora e situacion di bida di mucha cu nace, adulto y anciano.
Pasobra Aruba den e temponan di crisis mundial, tin placa a base di e tremendo labor di sigur e experto financiero mr. Xiomara Maduro, Aruba por bay percura pa mas asistencia social responsabel y ampliacion di e condicionnan di bida di cada Arubiano, cu ya ta topa cu un fin di aña cu ta haci posibel pa depone placa den e sombre di Dande.
Den circulo mundial e exito financiero di Aruba na man di mr. Xiomara Maduro ta wordo admira y na vispera di celebracion di 25 aña Status Aparte, Aruba ta subi lista di paisnan cu autonomia financiero, cu ta e base di Status Aparte.
Continuacion di e maneho aki ta necesario ya cu Aruba mester sigui paga e debenan cu Gobierno di Mike Eman a laga atras y cu ta haci cu awe, Gobierno no por aumenta tur salario di Gobierno, tur pensioen, tur asistencia social sin midi. Gobierno mester tene cuenta cu e debe nacional di Mike Eman cu mester paga y ta wordo kita for di e suma, cu ta alcansa e Pueblo di Aruba, cu awor mester bay traha riba e 7 puntonan di prioridad, cu despues cu Gobierno Wever-Croes a saca Aruba for di abismo financiero, lo haci cu bienestar renoba lo alcansa porta y cartera di tur Arubiano!
