ORANJESTAD (AAN): Fundacion Mi Voz Ta Bo Voz a yama un rueda di prensa unda Magaly Dijkhoff-Arends den funcion di coordinadora
a hiba palabra pa asina comparti cu comunidad algun desaroyonan importante relaciona cu dos proyecto.
El a inicia elaborando riba e proyecto di 'Back to School'. Na 2020 nan a organisa e proyecto aki y pa esaki ta duna danki na tur esnan cu a yuda.
Aña pasa a yuda rond di 300 mucha cu nan articulonan pa scol y e aña aki e meta ta pa yuda 500 mucha, aunke e por bira hopi mas, a splica.
Mescos cu aña pasa, tin e posibilidad di adopta un mucha pa 150 florin. Pa esaki mester deposita e suma riba e cuenta di e fundacion y lo percura pa e mucha haya tur locual e mester pa scol, Dijkhoff-Arends a indica.
El a agrega cu e suma aki ta cubri 2 uniform, keds, tas y su articulonan di scol den e tas.
Tambe ta bay tin poni algun caha na diferente localidad. Aworaki tin 4 localidad cu a confirma y nan ta Dyon Center na Paradijs, Grind Coffee House na Coral Plaza, Impex na Sero Blanco y Yanti cu ta na Wilhelminastraat.
Nan ta bay tin e 'bins' aki pa esnan cu kier haci algun donacion. Cualkier cos chikito cu por yuda cu ne ta bonbini, a remarca.
E coordinadora di e fundacion a remarca cu nan ta consciente di e situacion y cu no ta facil pa ningun hende. Toch ta haci un apelacion pa yuda e fundacion pa asina por yuda mas tanto mucha posibel.
Esnan cu kier mas informacion por subi e facebook page: Mi Voz Ta Bo Voz y eynan pr haya e formulario cu mester yena pa e mucha cu mester di ayudo. Esnan cu por haci donacion lo por haya e number di cuenta of por contact e fundacion pa haya sa con por haci e donacion.
Pa e muchanan cu mester di ayudo ta pidi pa yena e formulario riba facebook y esnan cu no tin acceso na e medio aki por haya e formulario geprint pa yen'e y entreg'e bek na e fundacion, Magaly Dijkhoff-Arends a duna di conoce.
Locual ta pidi ta pa no yena e mucha su nomber varios biaha ya cu asina lo stroba di yuda otro muchanan. Duna e otro muchanan un chens. Lo keda den contacto cu otro fundacionnan pa asina por tin un 'screening' di e muchanan cu ta wordo yuda.
Pesey ta pidi cu si abo como mayor a pidi ayudo un caminda caba pa no aplica cerca otro fundacion of cerca Mi Voz Ta Bo Voz pa no stroba otro muchanan di wordo yuda.
Ta apela tur hende, como tambe na comercio pa duna un man pa asina e fundacion por yuda mas mucha cu ta posibel, a enfatisa.
Lisette Gomes, Presidente di e fundacion a agrega cu tambe a docentenan por registra algun mucha cu mester di ayudo.
Fundacion pa Nos Comunidad y otro instancianan lo yuda nan cu screening y pa proporciona listanan di muchanan cu nan ta 'handle' cu nan pa sa cu en berdad e mucha ta den necesidad, a agrega.
