ORANJESTAD(AAN)— Na caminda pa un eleccion nobo, Aruba mester traha un bon inventario di loke e pais a pasa aden y e loke e pais ta desea di conoce den futuro.
Awe mas cu nunca tur Arubiano mester sigura un bon futuro pa medio di nan voto den proximo eleccion, cu no mester ta basa riba duna sosten na e persona cu tin e palabranan mas bunita pero na prome luga sigura cu Aruba lo tin futuro.
E experencianan di Aruba sigur ta sostene e acuerdo cu Aruba a cera cu Hulanda pa haya asistencia financiero pero tambe sosten den reconstruccion di un pais realmente democratico, caminda e base di ley ta bira punto central.
Tin cierto asuntonan cu awe mas cu nunca ta bini dilanti despues di experencianan doloroso di Aruba riba tereno politico, caminda sin duda por a nota cu e confiansa di Pueblo di Aruba a wordo defrauda door di politica.
Na 2017 loke gobierno di Mike Eman a entrega futuro, tabata un bochorno total pa Aruba, cu a scapa di un calamidad total pa motibo cu e ta parti di Reino Hulandes cu a interveni na 2014.
Asina mes e fantasma di Citgo cu cual Mike Eman a haci Aruba rehen riba tereno economico, tabata tin influencia pisa pa Aruba sigur acopla na e caha bashi cu a keda atras na 2017.
Awe Aruba mester vota pa un futuro nobo, pero banda di restauracion pa futuro mester papia tambe di medidanan pisa cu ta bay tuma pa Aruba nunca mas conoce e situacion cu cual el a drenta 2018.
Aruba mester bay adapta su leynan y uno di e leynan cu sigur mester haya hopi atencion ta e ley cu ta regla con ta gasta placa di Aruba, cu ta e Ley di Contabilidad.
E Ley ta existi pero por mira con durante Gobernacion di Mike Eman, rapport tras di rapport ta indica, con a trapa riba e leynan aki y aparentemente nada por wordo haci.
Con por ta posibel cu e instancianan di control mas halto di e pais, cu ta Algemene Rekenkamer Aruba, cu ta controla cada cent di Aruba cu drenta of sali, ta papia di abuso den e maneho cu a wordo hiba den por ehempel e proyectonan Bo Aruba, y nada a pasa?
Castigo mester ta mara na un forma mas efectivo a abuso di placa y propiedad di Pueblo di Aruba, mientras experencia ta indica cu mester screen tambe personanan cu ta tuma luga den Parlamento.
Si den Gobierno un persona den ehecucion di su tarea mas facil por comete un acto ilegal cu den Parlamento, ta berdad. Pero un persona mester tin un base moral pa e por controla Gobernacion y ta mas cu evidente cu falta di control di gobernacion tambe a pusha Aruba den desastre.
Na momento cu Aruba bay vota pa su futuro den cual reconstruccion di economia y e situacion financiero ta central no solamente pa motibo di Covid-19 pero pa motibo di mal gobernacion cu a wordo hereda y a marca historia durante 2009 pa 2017.
Aruba den futuro mester cera porta pa abuso di poder, abuso di placa y propiedad di Pueblo cu sancionnan pisa!
