Fundacion Kapel di Bethania ta cera aña 2025 cu gratitud y speransa pa futuro

ORANJESTAD (AAN): Un reflexion  riba aña 2025 como un aña cu tabata yen di retonan, pero tambe di hopi bendicion y logro.

Durante e aña, nos a enfrenta diferente dificultadnan, entre nan problema cu e edificio, unda cu awacero  a causa danjo significativo. A pesar di esaki, cu fe, perseverancia y apoyo di hopi parti, nos a sigui dilanti.

FKB ta gradici di curason na henter comunidad pa e sosten continuo cu a haci posible pa nos por realisa varios actividadnan exitoso. Entre nan, nos kier destaca e celebracion di Dia Nacional riba 18 di Maart, weganan pa mucha den Feria di Dia di Rey, y e organizacion di un campamento hubenil, cu tur a contribui na fortalece comunidad y fe.

Un momento hopi especial tabata e misa di celebracion di e 5 aniversario di Fundacion Kapel di Bethania, un parti importante den nos historia, cu a uni parokiano, voluntarionan y amigo di kapel den agradecimento y celebracion.

Pa cera e aña, nos tambe a celebra cu gratitud e inicio di e proceso di renovacion di e kapel, un proyecto importante pa conserva e edificio monumental aki, cu ta spera cu lo ta cla pa otro aña.

Fundacion Kapel di Bethania ta gradici tur hende cu, di un forma of otro, a sostene, yuda y apoya nos fundacion. Danki na boso compromiso, nos por sigui cu nos meta di conserva y proteha e kapel pa generacionnan futuro.

Nos ta desea tur nos voluntarionan, parokiano di Noord y henter pueblo di Aruba un bon Pasco y un felis Aña Nobo. Nos ta spera y confia cu nos lo por sigui conta cu boso sosten tambe den 2026.