ORANJESTAD (AAN) – Fundacion Hunto Grandi, Grandi Hunto, ta organizando un Seminario tocante Demencia cual enfoke ta riba e personanan cu ta duna e cuido informal, na pashentnan cu demencia.
E lo tuma lugar diasabra 10 di Juni awo, na Santa Teresita Center, na
San Nicolas. Horario ta 9.30or di mainta pa 1.30’or atardi.
Rosa Leon, coordinador di e fundacion, den entrevista cu DIARIO a comenta cu no ta un secreto cu Demencia ta birando un problema hopi grandi na Aruba.
E fundacion kier trece hopi concientizacion tocante kico Demencia ta, pero tambe kico ta e cuido cu esnan cu ta dune ta, y kico e ta trece cune, vooral e stress y dolor cu nan tin ora nan ta mira nan famia bay atras y con nan por cuida nan mes pa por brinda e pashent e miho calidad di bida e tempo cu nan tin.
Leon a splica cu vooral ora hendenan ta baha cu pensioen si nan no keda activo, esaki por trece hopi malesa pa nan y Demencia ta un di nan. Pesey e fundacion ta boga pa “acting aging” cu ta hopi importante. Kizas no por minimiza e malesa, pero retrase un tiki, y pesey nan ta fomenta e “acting aging” den e adulto mayor.
Den tur e actividadnan cu e fundacion ta organiza nan ta purba prepara e adulto mayor pa baha cu pension, y cuminza sondea kico ta locual nan kier haci pasobra hende no ta prepara pa baha cu pension pero ta wak’e como algo bon.
Pero despues di un of dos luna e molesternan ta cuminza, preocupacionnan, y e cabes ta traha mas di lo normal den un mal sentido. Pesey e fundacion ta duna mas informacion riba tur locual y conocemento di tur aspecto cu ta encera un adulto mayor. Den e cuadro aki nan a acerca diferente instancia, entre otro Cas Marie pa nan por duna mas conocemento tocante Demencia.
