ORANJESTAD (AAN): Na momento cu insancianan oficial manera entre otro Gobierno y Bureau Rampen Bestrijding informa cu den e siguiente dianan e posibilidad ta grandi pa nos experencia un horcan. Ta importante pa nos sigui cu preparacion.
Como 72 ora of 3 dia prome cu yegada di horcan: (*) Pone un tas disponible den cual tur material y obheto importante ta wordo hinca. Considera esaki e tas di emergencia. (*) Acumula documentonan cu pa bo y bo famia ta importante manera Passport, historial di malesa of di medicina nesesario y hinca esakinan den ziplock di plastic y den e tas di emergencia. (*) Traha of cumpra un first aid kit consistiendo entre
otro di pleister, betadine, gasa, verband y pildo pa dolor manera paracetamol of voltaren y demas articulonan cu por ser uza den caso di heridanan cu no ta rekeri asistencia medico inmediato. (*) Si bo persona of miembro di famia ta uza medicamento diario, controla y percura pa tin suficiente medicamento pa algun dia. Hinca e medicamentonan aki den ziplock y den e tas di emergencia. Haci mesun cos den caso cu un persona di famia ta haci uzo di un aparato diario.
Tambe: (*) Hinca algun snacks y boter di awa den e tas di emergencia. (*) Haci un solo persona responsabel pa tin y hiba cu ne e tas di emergencia na tur momento. (*) Percura pa tin flashlight cu bateria y tambe bela cu swafel den cas. (*) Sinta y traha un plan di evacuacion den caso cu famia mester evacua di nan localidad. No lubida di incorpora mascotanan den plan di evacuacion.
Como 48 ora of 2 dia prome cu yegada di horcan: Prepara un espacio den cas unda famia lo bay encontranan nan mes durante e oranan cu e horcan ta pasando. E espacio aki preferiblemente ta un espacio unda tin poco of menos glas, bentana y porta. (*) Prepara espacio na unda mascotanan lo pasa e horcan. (*) Yena gasoline of diesel den auto. (*) Percura pa tin suficiente awa pa bebe pa cada miembro di famia (2 liter pa persona). (*) Cumpra algun cuminda di bleki y snacks (percura pa tin mecanismo di habri bleki na man). (*) Si tin carni di frigidaire, hisa e temperatura di frigidaire y vriezer na maximo capasidad y evita di habri esaki regularmente.
Como 24 ora of 1 dia prome cu yegada di horcan: (*) Segura cu porta y bentana ta claba of tapa cu playwood of algun otro material fuerte. (*) Charge telefoon y demas aparatonan electronico esencial. (*) Repasa e plan di evacuacion. (*) Prepara weganan electronico y no electronico cu famia por entretene nan mes durante e siguiente ora y dianan.
Keda pendiente pa edicion nr 3 unda Departamento di Salud Publico den colaboracion cu Bureau Rampenbestrijding lo delibera riba: “Kico pa haci durante y despues cu un horcan caba di pasa.”
