ORANJESTAD (AAN): Siman pasa, Minister di Husticia y Asuntonan Social sr. Rocco Tjon a reuni cu KPA y Setar den cuadro di e siguiente fase di e proyecto di camara di surveillance. Durante e reunion aki, a ricibi un presentacion di e siguiente fase cual lo wordo aproba e luna aki, y esaki lo percura pa ful centro di ciudad di playa ta ekipa cu camara di siguridad. Asina, por
conclui cu desde e inicio di Gobernacion di Gabinete Wever-Croes, tin un total di 219 localidad cu tin camaranan di siguridad, y cu e aprobacion di e proyecto aki, lo bay bin 47 camara di siguridad adicional, pa asina sigui combati criminalidad riba nos isla.
Manera ta conoci, e prome fasenan cu a wordo ehecuta pa loke ta camaranan di siguridad tawata den e high-rise area specificamente banda di lama y e high-rise hot zone, como tambe pa area di centro di ciudad na San Nicolas. Adicionalmente, a aproba tambe e camaranan cu ta bay wordo pega na e 47 luganan strategico, pa asina por asisti Cuerpo Policial aun mas, pa combati criminalidad mas eficiente.
Ta asina cu siman pasa a haya presentacion di e siguiente fase cual probablemente lo wordo aproba e luna aki, y esaki lo percura pa ful centro di ciudad di playa tambe ta ekipa cu camara di siguridad. Banda di esaki, e proyecto pa loke ta e Operation Command Center tambe ta den pleno ehecucion, caminda e diferente fasenan di e proyecto di camara lo wordo centralisa na e localidad aki, pues loke ta e imagennan, esakinan lo wordo supervisa y analisa door di un ekipo multidisciplinario, kende tambe lo comparti e imagennan cu e departamentonan hudicial cu tin mester di esaki pa por eherce nan tarea.
E proyecto aki ta conta cu un inversion di alrededor di 700 mil florin, mirando cu e edificio lo bay wordo renoba y restaura por completo, pa por cumpli cu e exigencianan ambos di e operadornan cu lo wordo ubica akinan como tambe e aspectonan di siguridad. E inversion aki lo encera e parti di tecnologia entre otro tur e pantayanan y software cu ta necesario, mueblesnan nobo, pero tambe e parti di mantencion pa e cinco añanan nos dilanti, pues tur loke ta encera mantencion tambe lo wordo cubri den cuadro di e proyecto aki.
Por ultimo, e mandatario a indica cu desde e inicio di Gobernacion di Gabinete Wever-Croes, tin un total di 219 localidad cu tin camaranan di siguridad, y cu e aprobacion di e proyecto aki, lo bay bin 47 camara di siguridad adicional, pa asina sigui combati criminalidad riba nos isla.
