Fundacion Hende Homber ta celebra 10 aña di existencia en grande

ORANJESTAD (AAN): Diamars mainta Fundacion Hende Homber (FHH) a tene un conferencia di prensa, relaciona cu nan di 10 aña di existencia.

Fundador di FHH Ted Hasham a cuminza na bisa cu e fundacion a lanta riba 1 di November di 2013 y cu riba 4 di November di e aña aki ta bay festeha en grande e 10 añanan di existencia.

Hasham a splica cu tur cos a cuminza despues cu e tabata combersa cu su casa, kende tabata traha pa Fundacion pa Hendenan Muher den Dificultad.

El a puntra e casa cu si nan fundacion ta atende cu hende muher, ta ken ta atende cu e hendenan homber y e ora ey su casa a sugeri cu quizas e por cuminza cu algo.

Hasham a dicidi di tuma e reto, pasobra el a realiza cu si por ehempel yuda e muher pa e bay bek cas na dado momento, lo ta mihor pa e persona cu na cas a causa e problema, esta e homber, tambe ta prepara pa ricibi e muher bek den cas.

DIARIO a puntra Hasham si ta yuda tanto e hendenan homber cu a causa e problema, como tambe hendenan homber cu ta victima y el a splica cu ambos ta wordo yuda.

Specialmente e hendenan homber cu a bira victima di abuso di parti di nan pareha of casa, no ta desea pa mucho hende sa esaki, pues esey ta un parti dificil di e trabao cu FHH ta atende cune.

Presidente di e fundacion desde 2020 Rendon Noel tambe a hiba palabra Diamars mainta.

El a splica cu riba e dia di celebracion lo celebra bienestar di e hendenan homber na Aruba cu ta marcando e diferencia den nos comunidad.

“Esey ta un di e metanan di nos fundacion, esta impacta e hendenan homber pa nan haci un diferencia den nos comunidad”, segun Noel.

Riba 4 di November ta bay tin personanan riba escenario cu ta bay comparti nan experiencia.

Un di nan ta financial coach Francis Groeneveld, trahador social Rhomyko Winklaar, Dr. John Croes, Educational Consultant Raymond Maxwell, Pastor Gino Frans y sex coach Geraldine Alexander.

Tur cos ta tuma lugar na Imax den Gloria di 9’or di mainta te cu 3’or di atardi.