Instabilidad a keda atras den Caribe mientras e tabata aleha
*Sint Maarten a cera aeropuerto pa despues alivia medidanan
*Ruta fuera di loke ta considera normal a hunga papel grandi
ORANJESTAD (AAN) — Un sistema tropical durante fin di siman atrobe a percura pa un situacion special den region di Caribe desspues cu na 2023 ya Aruba a haya prueba di kico por pasa ora un tormenta tropical dicidi di cambia di rumbo pa asina a baha riba e isla y a causa basta dolor di cabez.
Den fin di siman tabata e tormenta tropical Philippe cu a percura pa hopi tension sigur na paisnan na entrada di Caribe for di Oceano Atlantico.
E sistema tabata biaha te casi final di siman cu un ruta Noordwest, loke a haci cu no tabata tin ningun alarma special cu a resona na e paisnan na entrada di e region di Caribe, cu a haya nan mes den un situacion di basta problema.
Na cierto momento, e tormenta tropical no a sigui bay ariba ni West pa, mescos cu a pasa ora Aruba a wordo sorprendi algun siman pasa, baha for di Noord bini mas abou pa despues dicidi pa un ruta Noord West, cu a haci cu el a pasa riba islanan na entrada di region di Caribe.
DIARIO durante fin di siman tabata den contacto continuo cu e islanan aki, mientras e otro partinan di region di Caribe a sinti cu algo special tabata pasa cu e situacion di un calor inmenso cu a manifesta su mes.
Basta confusion tabata reina na e islanan na entrada di Region di Caribe, manera Sint Maarten cu a registra biento fuerte pero mas laat tambe yobidanan aunke ya a cancela e advertencianan cu tabata tin.
Na e parti mas Zuid di Region di Caribe den vecindario di Aruba y ariba e continente di Venezuela, por a cuminsa tuma nota di areanan di mal tempo, cu a provoca awacero cu strena y lamper.
Mientras Philippe a sigui direccion pa Merca, den e region di Aruba por a nota con te na momento cu DIARIO tabata bay imprenta, e posbilidad di yobida pisa y strena y lamper a presenta.
Den edicionnan e siman aki DIARIO lo informa cu detayes kico ta causante di e rutanan cu sistemanan tropical ta sigui.
Segun loke ta considera regla, e sistemanan normalmente ta cana di Africa bini region di Caribe pero na 2023 por a mira sigur con nan ta crusa hasta America Central pa bandona Pacifico y sigui crece den region di Caribe.
Den e fin di siman aki por a mira un Philippe cu a ripiti e ruta di baha pa bay Zuid y despues bolbe dicidi pa un ruta Noord afectando islanan cu a deshaci di medidanan cu cierto islanan na entrada di Region di Caribe a tuma pero a haya nan mes cu biento fuerte, laman sumamente bruto y yobidanan.
Ayera tardi e condicionnan di tempo den region di Caribe sigur ta urgi Aruba pa tene na consideracion cu ainda e temporada di horcan no a termina y cu condicionnan den un rato corto por bira favorabel pa awasero cu strena y lamper.
