Fundacion FUDA a yuda pa deseo di Nicolás Kelly bira realidad

E kier a mira bahada di solo riba Pier Hadicurari

ORANJESTAD (AAN): Sin duda alguno, Fundacion FUDA ta sigui yuda varios ciudadano na Aruba, kendenan ta haci nan ultimo deseo di bida y ta busca forma pa yuda pa e deseonan ey bira realidad.

   Recientemente riba un Diasabra, e team di Fundacion Ultimo Deseo Aruba (FUDA) a bay haci e deseo di Nicolás Kelly bira realidad.  E deseo a wordo transmiti na nan via su nieto Xavier.

  Xavier a splica cu su abuelo e ultimo dianan tabata sigui bisa, cu e lo kier bay un biaha mas bishita su lugar faborito, cu ta e Pier di Hadicurari, y di eynan observa e bahada di solo.  Nicolás a splica cu for di tempo e tabata chikito e por a bay lama cu su padushi, tambe su tata, y rumannan.  Despues e tambe a haci esey cu su mesun yiu homber, y tambe cu su nieto Xavier, kende ta su gran orguyo y el a hasta bautisa e boto di dje cu e nomber ey.

   Nicolás a traha 30 aña cu Setar NV, te ora cu el a baha cu pensioen y a usa tur su tempo liber na pesca.  Esaki tabata su gran pasion.

   Na final di dia, e nurse di FUDA y tambe chauffeur di Ambulance di Faith & Hope, a yega na cas di Nicolás.  Nan a busk’e hunto cu su casa Linchi y su yiu Rivelino.  Asina nan a core bay na e Pier di Hadicurari, unda demas famia y amigonan tabata warda riba dje.

   Na e pier mes, unda cu su mesun boto ta mara, tur hende a bin para rond di dje.  Fundacion FUDA a entrega Nicolás un peluche special di nan.  Tabatin diferente pasaboca dushi traha, y tambe MooMba Beach Restaurant a trece dos snackplatter na e Pier.  Nos Clubhuis Hadicurari, na cual organizacion Nicolás tabata un miembro fiel, a yuda e atardi aki cu algun cos di bebe pa refresca garganta.

   Asina Nicolás por a mira e bahada di solo cu tanto tabata su deseo.  Fundacion FUDA kier a gradici tur hende cu di un of otro forma a yuda pa asina cumpli cu deseo di Nicolás, y cu a hasta haci donacion.  Sin boso, e Fundacion no por a haci e bunita trabao aki.

   FUDA a wordo lanta pa asina cumpli cu ultimo deseo di ciudadanonan na Aruba cu ta riba cama of ta sufriendo di malesa terminal.  Esnan cu kier haya un deseo of kier yuda, por check e website di fuda-aruba.com y tambe por yama 732-7373 pa tur cos.