ORANJESTAD (AAN): UNESCO Aruba, secretariado di e Comite Nacional di Aruba pa UNESCO su programa di Memory of the World (MoW-AW),
a anuncia cu e documentonan relaciona cu sclavitud na Aruba a wordo oficialmente inscribi den e registro di Memory of the World di UNESCO.
E decision a tuma luga diabierna durante hunta di e Executive Board di UNESCO na Paris.
E documentonan en cuestion ta forma parti di coleccionnan di Archivo Nacional Aruba (ANA) y Biblioteca Nacional Aruba (BNA) y ta duna claridad tocante bida di hendenan sclavisa y nan descendientenan na Aruba.
Cu e inscripcion aki, oficialmente e documentonan aki di Aruba ta forma parti di e registracion existente "Documentary heritage of the enslaved people of the Dutch Caribbean and their descendants (1816–1969)”, cu tabata tin contribucion caba ta Corsou, Sint Maarten, Surnam y Hulanda. Corsou tambe a haci agregacion nobo na e registracion existente aki y esakinan tambe a wordo inscribi diabierna.
E nominacion a wordo prepara den colaboracion entre MoW-AW, UNESCO Aruba, Archivo Nacional Aruba y Biblioteca Nacional Aruba - Arubiana-Caribiana + Digital Collections.
E inscripcion aki ta reconoce e balor unico y internacional di e documentonan di sclavitud na Aruba, como fuente importante pa compronde nos pasado colonial y su influencia den presente.
Pa MoW-AW, esaki ta un logro historico. E reconocemento internacional aki ta duna voz na e gran cantidad di hende cu a sufri den e periodo di sclavitud y ta yuda fortalece nos identidad como pueblo. Banda di esaki, e inscripcion na e registro internacional aki ta stimula trabounan di preservacion, digitalisacion y accesibilidad di documentonan historico cu a bin ta tumando luga por medio di e plataforma di Coleccion Aruba.
E documentonan inscribi, ta accesibel via https://coleccion.aw/browse/?col=mow-aw
pa scol, investigadonan y comunidad den su totalidad.
MoW-AW lo ta preparando un celebracion publico pa marca e momento importante aki y ta spera cu mientrastanto e logro aki lo sirbi como reflexion y stimula dialogo riba e legado di sclavitud na Aruba.
MoW-AW, UNESCO Aruba, ANA y BNA kier gradici tur partner cu di un of otro manera a contribui na e nominacion, tanto local y internacional.
Un gradicimento y felicitacion special na tur esnan di Archivo Nacional y Biblioteca Nacional y tambe na coleganan di Corsou, Sint Maarten, Surnam y Hulanda cu a traha hunto pa logra esaki.
