Fundacion FEPA ta sigui brinda oportunidad pa sigui studia y desaroya

Awor cu diploma reconoci pa Examenkamer Nederland

ORANJESTAD (AAN): E Fundacion Enseñansa pa Aruba (FEPA) desde aña 2007 ta brinda e comunindad di Aruba, especialmente adultonan, e oportunidad pa sigui studia. Señor Randolf Vrolijk, di FEPA a elabora riba e cursonan cu por sigui na FEPA. E aña escolar cu a termina, tawata un aña hopi exitoso cu hopi graduado cu awe a drenta e sector laboral danki na e diploma obteni.

   Señor Vrolijk a remarca cu aña pasa, FEPA a wordo audita pa Examenkamer Nederland y awo certificadonan lo contento e logo cu nomber di Examenkamer Nederland. Esaki ta un logro grandi di FEPA despues cu Examenkamer Nederland a evalua e calidad di enseñansa cu nan ta brinda. Na Aruba no tin un ley cu ta reconoce certificado y na e momento aki, FEPA ta e unico instancia di enseñansa na Aruba cu tin e permiso aki cu ora cu termina un curso, lo haya e logo di Examenkamer Nederland riba dje.

   Cursonan cu por sigui na FEPA ta entre otro; Internet; Life Coach; Paralegal; Toegepaste Psychologie; HR Management; Marketing y Sales; idiomanan. Actualmente, segun e ultimo Censo, e situacion di esnan cu no a caba un estudio segundario ta para riba un 71,71 porciento. FEPA ta purbando pa drecha esaki y pronto lo hiba conbersacionnan cu Gobierno di Aruba pa propone mas curso riba nivel di MBO 1,2, 3 y 4 pa duna nos comunidad un segundo te hasta un tercer oportunidad pa sigui studia y desaroya nan mes teniendo cuenta cu edad y orario di trabou. Asina ta yuda ciudadanonan haya un diploma reconoci, mehora nan posicion riba mercado laboral y tambe mehora nan calidad di bida.

   Señor Vrolijk a duna di conoce cu FEPA tin hopi plan ainda pa desaroya. Proximamente, FEPA lo tin un openhouse publico pa asina tambe posiciona nan mes miho den comunidad y tambe pa wak kico ta e necesidad di pueblo pa loke ta trata curso y estudionan. Tambe ta pensando pa bin cu un congreso pa asina comerciantenan tambe indica nan necesidadnan. Ta trahando tambe riba un concepto nobo na Aruba pa dropouts pa asina nos hobennan por haya un miho empleo cu lo conduci na drecha nan calidad di bida. FEPA su intencion ta pa brinda mas oportunidad pa nos pueblo door di curso y estudionan cu lo yuda nan mehora den tur aspecto di bida.