Marc Figaroa, Director di APA:
- Pa aña 2026 lo tuma lugar tur e mantencion
ORANJESTAD (AAN) Señor Marc Figaroa, director di Aruba Port Authority (APA), den entrevista cu DIARIO a indica cu aña pasa APA a asumi e maneho di Welcome Plaza, y e otro kiosconan den cercania.
“Esaki ta mas tanto pa e atencion y organizacion tambe y pa brinda e experiencia na e cruseronan, elevando e servicio aki.
“Manera ta conoci tin cierto mantencionnan cu ta atrasa, dus nos a tuma esaki, tuma e maneho y cuminza inverti eyden. Kico ta bay pasa eynan, pa awor e lo keda manera e ta, pero si cu reglanan di comportacion, kico por bende, kico no. Loke tin actualmente si, pero na un manera mas nechi, mas profesional y mas structura. Nos a inverti pa pone e bañonan, esey tabata un di e retonan cu tabata tin den pasado. Nos a renoba e bañonan, haci nan mas accesible pa e usuarionan”, señor Marc Figaroa a duna di conoce.
Figaroa a agrega cu APA a inverti tambe den basta bari di sushi cu ta un di e retonan di mas grandi cu tabatin; riba e dianan druk cu tin tres barco por a wak cu e sushedad ta aglomera, y no tabata tin suficiente. A inverti den esaki pa mehora e servicio y e experiencia cu nan ta brinda.
“Mi kier mantene e ‘remote control’ mas controla tambe, e luz, facilidadnan di infrastructura, pa mehora esaki”, director di APA a señala.
El a subraya cu 2026 ta e aña di mantencion y ta planea pa verf e lugar, dun’e e facelift cu ta necesario. “Principalmente e parti di e portanan cu no ta adecua, y nan a cambiando tur e portanan cu companianan local cu por haya e support tambe cu ora algo daña por haya e servicio tambe”, señor Marc Figaroa, director di APA, a señala.
