Fundacion Epilepsia Aruba a celebra ‘Purple Day’ cu exito na scol Paso pa Futuro

Riba dia internacional dedica na conscientisacion tocante epilepsia

ORANJESTAD (AAN): Aruba a bisti color biña riba 26 di maart, na ocasion di celebracion di ‘Purple Day’, dia internacional dedica na conscientisacion tocante epilepsia y mustra sosten na tur esnan cu ta biba cu e condicion aki.

Fundacion Epilepsia Aruba, a organisa un programa special na scol Paso pa Futuro (PpF), unda no solamente a celebra ‘Purple Day’, pero tambe a comparti informacion importante na e muchanan, docentenan y personal di scol.

Durante e siman di 23 pa 27 di maart Fundacion Epilepsia (SEA) a tuma un paso importante pa educa scol y comunidad di Aruba tocante e topico di epilepsia. Riba dialuna 22 di maart SEA tawata invita den e programa Nos Mainta. Diamars SEA tawata na scol PpF pa comparti informacion riba epilepsia na e docentenan. E topico tabata con pa reconoce un atake di epilepsia (seizure), e posibel causa, y kico pa haci (y kico no pa haci) ora un mucha tin un atake. Riba diaranson 24 Maart, informacion a wordo comparti cu e muchanan den un forma mas simpel y adapta na nan edad unda e tema tabata pa nan compronde kico ta epilepsia y pa nan no tene miedo.

Diahuebs, durante e celebracion di ‘Purple Day’, e programa a inclui presencia di Minister di Salud Mervin Wyatt-Ras, kende a mustra su sosten y interes den conscientisacion tocante epilepsia. Muchanan di e scol a impresiona tur hende cu un bunita obra teatral relaciona cu e tema di epilepsia, mustrando nan comprondemento y empatia.

Maryla Solognier, Vice Presidente di Fundacion Epilepsia Aruba, a tuma palabra hunto cu Jasmin Wever-Wever, PR di e fundacion y mama di un mucha cu epilepsia cu ta un studiante na Paso pa Futuro. Durante nan discurso, nan a comparti experencianan real y a pone enfasis riba e importancia di apoyo, comprondemento y bon comunicacion na scol y den comunidad.

Durante un momento emocional, Jasmin Wever a dedica un poema na su yiu Carrick, sigui pa  presentacion di un video caminda Carrick mes ta confirma cu e ta biba cu epilepsia, loke a causa un impacto grandi riba tur esnan presente.

Na final e muchanan a disfruta hunto di un momento dushi y alegre, cu ‘cupcakes’, chocomel, oatmeal cookies y appel. Tur esaki a wordo generosamente patrocina pa Bright Bakery, Compra NV., Ricardo y Lucia Wever, Casa Vieja y Subway.

Fundacion Epilepsia ta expresa un danki di curason na tur sponsor pa nan generosidad y sosten. Un danki special tambe na famia di Carrick, Karel y Danila Wever, Janice Wever-Kelly y Gregory Wever pa e decoracion cu blaas, y naturalmente na scol Paso pa Futuro pa nan disponibilidad den haci e celebracion aki posibel. Tur mucha a haci un trabou excelente y a mustra cu educacion y conscientisacion ta cuminsa na un edad hoben.

E meta di Fundacion Epilepsia Aruba ta pa durante henter e aña sigui comparti informacion, crea mas conscientisacion y kibra stigma rond di epilepsia. Door di educacion, nos por crea un comunidad mas comprensivo, unda tur mucha por sinti sigur y sosteni y nunca nan so.

Pa mas informacion, comunidad por sigui Fundacion Epilepsia Aruba riba red social, of por tuma contacto cu Margarita na 593-5806, cu Maryla na 594-5362 of via This email address is being protected from spambots. You need JavaScript enabled to view it.. Hunto nos por crea mas comprondemento….Hunto nos por kibra e stigma….Bo no ta bo so!