Fundacion Corector di Papiamento a reuni despues di basta tempo

ORANJESTAD (AAN):  Recientemente, directiva di Fundacion Corector di  Papiamento a bolbe reuni despues di basta tempo.

Asina nan e miembronan a duna di conoce pa medio di nan Facebook Page.

            Tabata un reunion fructifero pa delibera y intercambia di pensamento entre otro di un curso nobo cu lo cuminsa na maart 2023.

            Lo organisa e Curso di Capacitacion aki cu colaboracion di e gran maestronan di Papiamento, Sr. Ramon Todd Dandaré y Sra. Joyce Pereira. Pa participa na e curso e interesado ya caba mester tin cierto grado y nivel di conocemento di Papiamento y ademas e mester pasa un test di admision prome.

            E enfoke di e curso ta pa e participante siña e habilidad di corigi y revisa texto den Papiamento. Entre otro texto huridico, literario, comercial y general. Un curso hopi interesante den cual lo siña con pa aplica tur regla di ortografia y gramatica.

            Esaki sigur ta cumpli cu un di e metanan di FCP, esta promove e bon uzo y skirbimento corecto di idioma Papiamento.

Potretnan: Facebook Page Fundacion Corector di Papiamento