ORANJESTAD (AAN): Fundacion Contra Violencia Relacional (FCVR) ta organisa diasabra awor nan colecta riba caya.
Astrid Muller, secretaria di e directiva di FCVR a duna di conoce cu nan tin un par di aña cu nan ta organis’e dos biaha pa aña.
E aña aki a dicidi di hacie tres biaha pa aña y e meta di e colecta e biaha aki ta pa uza algun espacio di almacenamento y ta bay converti nan den oficinanan caminda por duna miho servicio na e clientenan, principalmente den loke ta cuido social, Muller a indica.
El a sigui bisa cu FCVR tin tres diasabra mas y un a pasa caba. E fondonan cu nan a recauda siman pasa tabata bon. Nan a spera mas y por haya mas si tin mas boluntario. P’esey nan ta haci un yamada na esnan cu ta interesa pa bira boluntario pa manda un WhatsApp na 593-2767 of riba facebook.
Diasabra proximo, 2 di augustus y tambe otro siman dia 9 di augustus lo tin actividad na rotonde di Santa Cruz, di Noord, di Tanki Leendert, Imelda Kleuterschool y tambe na Bontires na Ponton. Si haya boluntarionan pa tur punto lo ta hopi bon, Astrid Muller a expresa.
Normalmente cada punto por tuma minimo 4 persona pa 8 of un tiki mas pa apoya y encurasha otro. Cada punto tin un borchi pa identifica e fundacion, el a enfatisa.
FCVR ta hopi agradecido cu esnan cu ta boluntario y cu a inscribi y cu tey casi tur biaha. “Pa nos esey ta algo hopi aprecia pasobra ta bo tempo liber y bo ta para eyfo ta colecta”.
Nan meta pa e campaña aki ta 30 mil florin pa e tres diasabranan pa asina e fundacion por sigui brinda ayudo. Otro biaha tabatin otro metanan y algun tabata pa cubri gastonan operacional, el a agrega.
