CEO di Aruba Conservation Foundation cu sentimento di gratitud pa tur park ranger

*Nan ta haci un trabao incansabel y impagabel

ORANJESTAD (AAN)— Tyson Lopez, director di Aruba Conservation Foundation (ACF), den entrevista cu Matutino DIARIO a elabora na e siman di aprecio pa e park rangernan, cu nan a cuminza celebra caba, cu un actividad.

Esaki ta un siman cu hopi actividad pa duna danki na e trabao cu nan ta haci yena cu hopi dedicacion, amor, pasenshi, trahando super duro.

“Esaki ta e prome actividad, pero tin hopi otro actividad planea durante e siman, entre otro, Diaranzon nos ta cera mitad dia pa haci un actividad cu e team completo di Aruba Conservation Foundation, p’asina nos por sigui uni como un Organizacion y duna un danki grandi pa e trabao cu nan ta haciendo”, Tyson Lopez a señala.

Lopez a señala tambe cu internamente tin hopi proceso ta andando y enberdad nan mester: “Na prome lugar, mas hende; pero tambe nos ta ocupa cu nos proceso di CAO, cu hopi hende sa cu pa hopi aña nos no tin uno. Nos a cuminza cu e proceso aki y nos ta den negociacion p’asina tambe nos por busca mas hende pa tur cos ta bon regla, cu eigenlijk tin hopi aña para y nos ta purbando di regla nan, p’asina nos por sigui dilanti”, Director di ACF a indica.

Pa loke ta trata autoridad, Lopez a reitera cu ACF tin suficiente autoridad pa bisa un hende kico nan por haci of no haci den un area, pero ora bo yega pa reinforc’e, nan tin cu yama otro pa bin yuda nan, entre otro, Polis.

“Esaki tambe ta algo cu semper nos ta boga riba dje, pa nos por haya, pasobra tin biaha nos ta haya, por ehemplo, rosamento di mondi, bo ta para dilanti di e infractor bisa nan stop, pero bo ta yama polis, bo ta keda eynan pa un ora of dos ora, nada no pasa.

Dus, esey ta algo cu nos tin cu mehora p’asina nos por haci e trabao aki, miho”, Tyson Lopez, CEO di ACF a expresa.

Finalmente, el a gradici e rangernan, bisa nan masha danki pa e trabao hopi duro cu nan ta desplega, incansable y impagable cu nan ta haciendo p’awe pero pa e futuro generacion tambe, y pa henter Aruba.