ORANJESTAD (AAN): Fundacion Contra Violencia Relacional (FCVR) ta traha activamente pa ofrece apoyo sigur y accesibel na persona cu ta enfrenta violencia relacional na Aruba.
Pa yuda victima den momento critico, FCVR tin un WhatsApp crisis line: 567-1670. E crisis line ta disponibel pa contacto discreto y confidencial, unda victima por busca apoyo den momento di necesidad.
FCVR ta provee Case Management, cu un enfoke personalisa riba cada situacion. Esaki ta inclui evaluacion di riesgo, orientacion continuo y acompañamento den e proceso di busca soluciona duradero. Solucionnan manera asistencianan legal, social, psicologico y emocional, semper cu respet pa e dignidad y autonomia di e victima.
Un otro servicio esencial cu FCVR ta ofrece ta Safety Planning. Hunto cu e victima, FCVR ta traha riba un plan practico y realistico pa aumenta seguridad, preveni escalacion y proteha tanto e persona como su famia. Tur servicio ta enfoca riba bienestar y proteccion di e persona afecta.
Violencia relacional no ta un asunto isola, pero un problema social cu ta afecta nos comunidad henter. Atrabes di su servicio, FCVR ta contribui activamente na crea un Aruba mas sigur, mas consciente y mas prepara pa enfrenta e realidad di violencia relacional.
Pa busca apoyo, por manda un mensahe via WhatsApp na 567-1670.
