Chiropractor Renato van Putten: “Nos cultura na Aruba ta hopi sedentario”
ORANJESTAD (AAN) -- Chiropractor Renato van Putten, a sigui elabora den entrevista cu Matutino DIARIO, tocante e pakico hopi hende na Aruba, no solamente Adulto Mayor, pero personanan relativamente hoben, ta sufri di problema di lomba. Hopi biaha e tin di haber cu e trabao cu e persona ta eherce y otro factor ta herencia, Renato a trece dilanti.
“Mi ta corda 25 pa 30 aña pasa cu mi tabata tin hopi chauffeur di Arubus, primeramente pasobra e busnan no tabata adecua, nan tabata core un marca di bus cu su stoelnan no ta adecua pa core tur dia, pero mas tanto distancia pa hiba muchanan scol bin bek, no ocho of dies ora sinta ta stuur. Esey a cambia un poco pa otronan, pero enberdad e problema ta keda cu stoelnan mester ta hopi mas adecua pa e busnan. Hopi biaha ta wordo mira riba e costo di e bus pero no e costo pa e trahado”, van Putten a subraya.
El a bolbe na e mesun punto cu e rekisitonan pa trabao a cambia hopi.
El a reitera cu awo tin hopi mas hende cu ta traha tras di oficina, no obstante, antes e tabata haya hopi housekeeping cu problema di lomba. “Nan a baha hopi aworaki, no ta manera antes cu mester a haci tanto camber pa dia, nan tabata traha a base di volumen pa dia, loke ta laga hopi di desea. Antes un persona so tabata deal cu un camber, vooral di un cama grandi cu pon e sabana ta hopi mas dificil. Awo ta dos persona ta deal cu un camber, locual ta yuda. Awo tin mas comprension, mi no ta mire asina manera antes, pero e tabata hopi halto tambe”, Renato a splica.
