Tocante pakete di incentivo:
ORANJESTAD (AAN)-- Minister Geoffrey Wever, a reitera den entrevista cu Matutino DIARIO, cu e meta di e pakete di incentivo cu a drenta na vigor dia 1 di Januari 2026, ta pa den un periodo di dos aña hopi di e edificionan cu aworaki ta den mal condicion of incluso bashi, wordo renoba.
“E feedback cu mi a haya di comerciantenan cu ta doño di edificio ta hopi positivo. Hopi hende a bisa mi cu nan ta bay con ta haci uzo di e facilidadnan, haci nan renobacionnan, y aworaki ta e momento”, e dignatario a señala.
Minister Wever a agrega cu un persona por haci un renobacion en principio, si ta doño di un edificio caba, of e ta cumpra un edificio, no tin mucho tramite, pasobra e rekisito na Belastingdienst ta bay relativamente lihe, pa e traspaso tuma lugar.
E permiso di construccion si por tuma mas tempo, y pesey a pidi e departamentonan cu ta responsabel pa e tipo di permisonan ey, pa purba di duna tambe un push, pasobra nan kier pa esaki cana lihe. “Pasobra nos kier pa den dos aña of dos aña y mey nos wak e edificionan renova y no cu tur e peticionnan di bouwvergunning ta riba lesenaar ainda.
E mester ta naturalmente, un combinacion y mi ta wak cu e contesta di sector priva ta hopi positivo y aworaki ta djis laga nan haci nan trabao, y nos como gobierno e siguiente paso ta inverti den infrastructura, drecha e centronan di ciudad, tin e limpi constantemente, atende cu e problematica di adictonan ambulante, pone mas luz, y drecha e infrastructura en general, y naturalmente gobierno ta purba di drecha diferente departamento, manera a anuncia recientemente, e edificio di Aruba Bank, SER, y CDS. Cas Veneranda ta practicamente cla, cu ta e proyectonan cu gobierno tambe ta push, pero ta yuda e sector priva tambe”, Minister Geoffrey Wever a subraya.
