Fundacion CINEARUBA cu yamado na creadornan di peliculanan di ficcion, documentario y video di arte

ORANJESTAD (AAN): ‘Playa Film Festival’ ta e proyecto di mas nobo di fundacion CINEARUBA. Esaki ta un festival di cine di Oranjestad of Playa manera nos conoce den comunidad.

Tabata 2019 ora cu fundacion CINEARUBA a cuminsa traha riba e proyecto pa present’e na 2020 durante e celebracion di 10 aña di e fundacion.

            Door di e pandemia CIENEARUBA no por a lansa e proyecto, pero a sigui prepara e proyecto pa lansa na 2021. A scohe pa sigui traha riba e festival debi e necesidad cu tin riba e tereno aki. Pa e motibo aki a percura pa hinca e festival den otro na un manera cu e por cubri tur angulo, tanto e parti di provee un plataforma pa presenta talentonan local, pero tambe e parti di transpasa conocemento riba e tereno di cine y arte.

            E publico y e participantenan lo por spera tres dia yena cu peliculanan, pero tambe tayernan, seminarionan, ‘master classes’ y eventonan di ‘networking’.

            Pa por participa na e festival di cine lo mester registra riba filmfreeway.com/playafilmfestival, ey lo tin cu upload e pelicula of video di arte. Tur persona di tur edad por regista y upload nan pelicula. Tin dos categoria; pelicula cortico den competencia y peliculanan largo pa presentacion.

            E pelicula cortico of video di arte den competencia mester ta entre 5 pa 15 minuut di duracion. E no por ta mas bieu cu un aña y e no por ta disponibel riba YouTube. Esnan cu tin nan pelicula of video di arte riba Youtube of VIMEO por haci esaki priva.

            Tur pelicula y video di arte cu tin dialogo cu no ta na Ingles, mester tin subtitulo na Ingles. Esaki ta importante encaso cu nos rcomenda bo pelicula na un festival di cine internacional.

             Pa presentacion di peliculanan largo por registra peliculanan cu tin un duracion maximo di 2 ora. Inscripcion ta cera 20 di September 2021 y tur participante lo ricibi e resultado di seleccion riba 27 di September 2021.

            Ora bishita e link lo por wak un descripcion di e formato di e pelicula cu ta necesario pa ora di presenta e pelicula na e festival. Pa peliculanan cortico lo tin dos premio, uno di miho pelicula y un otro di pelicula faborito di e publico.

            Si tin mas pregunta por manda un email na This email address is being protected from spambots. You need JavaScript enabled to view it..