Fundacion Chico Harms ta invita pueblo pa celebra temporada di Dia di Brazil 2026

ORANJESTAD (AAN): Fundacion Chico Harms ta extende un invitacion na pueblo di Aruba pa celebra e Temporada di Dia di Brazil 2026,

un temporada dedica na cultura, folklore, tradicion y identidad Arubano.

   E celebracion di Dia di Brazil ta un iniciativa di Fundacion Chico Harms y e aña aki ta marca e 16 aniversario di e celebracion.

   E temporada ta cuminsa na comienso di Juli y ta sigui te cu e prome diadomingo di September, dia cu ta wordo celebra como Dia di Brazil. E fecha aki ta conecta cu temporada di cosecha, aniversario di Centro di Bario Brazil y e inauguracion di Caya Bernadina Growell-Kock, conoci como Mama di Cultura.

   Como parti di e programa, publico por disfruta di diferente actividadnan cultural, incluyendo Parada Acustico, Festival Cantica di Caya, Festival Un Canto na Bernadina, Batacaso Tipico, Eleccion y Coronacion di Reina Folklore Aruba, Parada cu Lanterna, Fiesta di Tambu y e gran Parada Folklore Cultural.

   E temporada lo culmina cu Parada cu Lanterna riba diabierna 4 di september y e gran Parada Folklore Cultural riba diadomingo 6 di september 2026, cuminsando 3:00 PM. E parada lo pasa den e areanan cu ta considera nan mes como parti di Brazil: Rooi Master, Caya di Brazil, Mabon, Noord Cura Cabay y Rooi Koochi.

   Fundacion Chico Harms ta invita henter comunidad pa participa y celebra e temporada aki den un ambiente dushi, sano y sigur. Nos ta conta cu presencia di pueblo pa sigui mantene nos cultura bibo y pasa nos tradicionnan pa siguiente generacionnan.

   “Brasa bo Cultura” y forma parti di e celebracion di Temporada di Dia di Brazil 2026. Pa mas informacion tocante e programa completo y pa keda al tanto di e ultimo update-nan, follow y bishita e pagina di Facebook di Fundacion Chico Harms.

   Fundacion Chico Harms ta gradici tur su sponsor y partnernan pa nan apoyo na e temporada aki, incluyendo: Aruba Tourism Authority, Ban Serio, DCA, NV Elmar, Astec, Setar NV, Unoca, Balashi y Rayo, cu ta contribui na e realizacion di Temporada di Dia di Brazil 2026.