Señor Gerro Koolman di IBiSA:
- Lo tuma 100 participante pariba di brug y 100 participante pabou di brug
ORANJESTAD (AAN) – Instituto Biba Saludabel y Activo (IBiSA) ta preparando un edicion nobo di su tradicional IBiSA Camp, unda muchanan lo por disfruta di un siman yen di deporte, recreaccion y enseñansa durante e vakantie di scol.
E campamento lo wordo organiza na dos localidad. Pa e area pariba di brug, e actividadnan lo tuma luga na IBiSA Sportcentrum San Nicolas, mientras cu pa e area pabou di brug e sede lo ta Club Kibrahacha. E campamento lo dura un siman, cuminsando dia 27 di juli, diariamente for di 8:00 di mainta te 12:00 di merdia.
Participacion ta habri pa muchanan entre 6 te 12 aña di edad. E costo ta AWG 35 pa participante y e cantidad di luga ta limita na 100 participante na cada localidad.
Hefe di IBiSA Sportcentrum San Nicolas, Gerro Koolman, a indica cu e programa lo ofrece un variedad di actividad educativo y recreativo. Durante e siman, e muchanan lo participa den charlanan interesante, deporte manera voetbal y volleyball, actividadnan artistico-creativo y buitendag cu actividadnan na aire liber.
Mayornan cu kier inscribi nan yiunan mester cuminsa e proceso online via e pagina di Facebook di IBiSA. Despues di scoge entre e campamento pariba of pabou di brug y yena e formulario di inscripcion, e informacion mester wordo manda na IBiSA.
Sin embargo, Koolman a enfatisa cu yena e formulario online so no ta garantisa un luga. Pa confirma e inscripcion, mayornan mester presenta personalmente na IBiSA Oranjestad entre 8:00 am pa 12:00 pm of 1:00 pm pa 4:00 pm, of na IBiSA San Nicolas entre 8:00 am pa 4:00 pm, pa completa e proceso. Na e momento ey, mester haci e pago di 35 Florin y presenta un AZV of otro seguro medico valido.
Koolman a recomenda pa e muchanan bisti paña comodo, decente y apropia pa deporte, manera keds of sapato cera, pa nan por participa comodamente den tur e actividadnan.
Finalmente, IBiSA ta haci un yamada na tur mayor pa hiba y busca nan yiunan puntualmente, pa garantisa un bon desaroyo di e programa y un experiencia positivo pa tur participante.
