Fundacion Centro Famia Piedra Plat a lanza su website y billboard nobo

Adrian Berg, Presidente: --- ORANJESTAD (AAN) – Fundacion Centro Famia Piedra Plat (FCFPP), a lanza su website y su billboard nobo, Diabierna ultimo, den oranan di atardi.

Señor Adrian Berg (Adri), Presidente di e FCFPP, a yama bon bini na invitadonan Minister di Enseñanza Endy Croes, Minister di Husticia y Asunto Social Rocco Tjon, director di CEDE Aruba Daniel Tecklenborg, y miembronan di prensa. Miembronan di Directiva di FCFPP y algun docente, tabata presente tambe.

Seguidamente, tabata tin un presentacion pa haya sa realmente, ken e Fundacion aki ta. Señor Berg a expresa cu kizas tanto prensa como e gobernantenan sa masha poco di e organizacion aki y pesey nan a haci un presentacion di ken nan ta y cu kico nan ta bezig ta haciendo.

Señor Berg a duna di conoce cu e Fundacion aki a wordo lanta pa su persona hunto cu docter Michael Kelly, cu pa hopi tempo tabata e docter di Cas di e Bario di Piedra Plat, ken awo ta residencia na Hulanda. “Nos a tuma iniciativa hunto cu e Iglesia di Piedra Plat e tempo ey, y tambe di hendenan di e bario y famianan. Nos a landa e fundacion aki pa sirbi e comunidad di Piedra Plat, Paradera y vecindario”, señor Berg a indica. 

META DI E FUNDACION:

“Como organizacion, nos tin tres meta: e prome ta establece un centro comunitario na Piedra Plat, riba un base di norma y balornan Cristian. E di dos, stimula e famia como e fundeshi di nos comunidad, y di tres: promove e desaroyo social, fisico, educativo y cultural, y talentonan di tur persona, di tur edad” señor Berg a splica.

El a agrega cu e sede di e fundacion ta un cas cu nan a cumpra na aña 2010. “E fundacion mes a lanta na 2008 y na 2010 nos a cumpra e cas aki den e forma di ‘huur-koop’,  unda cu nos a paga poco, poco, y danki Dios nos a caba cu e debe. Kiermen, e ta full nos propiedad. E cas aki tin 109 aña bieu segun miembronan di famia ta bisa mi”, Berg a relata y a agrega cu e cas ta antiguo pero completamente renova y amplia cu otro facilidadnan cu el a menciona.

“Actualmente, nos tin un average di 170 mucha y hoben cu ta bishita nos centro aki, semanalmente. No tur hunto, pero den gruponan. Aparte di esey tur e boluntarionan cu ta yuda nos”, señor Adri Berg a comenta.