Premier Evelyn Wever-Croes --- *Aruba mester di nos tur pa stop esaki --- *E caso ta un di esnan mas serio cu e isla a conoce
ORANJESTAD (AAN): Aruba e siman aki lo ta testigo di caso contra Benny Sevinger y 10 sospechoso mas. E caso ta un di esunnan mas serio cu Aruba a conose, y ta trata corupcion serio cu tereno.
E acusacionnan oficial ta:
- Soborno: Cumpra ambtenaar.
- Estafa.
- Falsificacion.
- Abuso di funcion.
Benny Sevinger ta worde sospecha tambe di falsificacion, estafa y abuso di su funcion, y aparte di tur esaki e ta worde acusa tambe di a tumamento di regalo of promesa, y labamento di placa! Cu esaki Benny Sevinger y demas 10 sospechoso no solamente a enrikece nan mes, pero a perhudica miles di famia y hobennan cu nunca mas por yega na nan cas. Esfuersonan ta andando pa kita e terenonan aki di e hendenan aki pero ta un proceso largo.
Ta hopi importante pa nos cada un pone bon atencion na e caso aki.
Pa loke ta trata e otorgamento di tereno, desde cu ex minister Marisol Lopez-Tromp a worde retira na oktober 2020, mi a delega e autoridad pa e departamento en cuestion bou di un sistema estricto di ‘checks and balances’ pa asina nunca mas un minister por mete den e maneho aki y pa evita corupcion. Esey tabata e prome paso.
Awor mi ta haci apelacion na henter comunidad. Aruba mester di nos tur. Empleadonan publico en especial cu mira e cosnan aki ta pasa, mester bin dilanti y denuncia corupcion. Comerciantenan cu ta worde pidi pa paga placa bou di mesa, mester nenga categoricamente y denuncia e corupcion aki.
Hunto nos por stop corupcion. Aruba mester di nos tur pa logra esaki.
