Carolina Span di Fundacion Autismo:
ORANJESTAD (AAN)—Carolina Span di Fundacion Autismo Aruba, den entrevista cu DIARIO, a duna di conoce cu e fundacion ta hopi bezig den diferente area, y un logro grandi den 2024 tabata re-institui e Comision Nacional, y esaki ta inclui diferente departamento local, y instancianan cu ta concerni no solamente cu mucha autista, pero cu otro trastorno di desaroyo.
“Y den e Comision nos tin un Departamento Directie Onderwijs, y nos tin tambe e Psikiatra di Mucha, y eigenlijk nos ta bezig ta wak na unda nos por identifica e gapnan cu nos ta haya pasobra nos ta un pais chikito, anto e nivel di specializacion cu tin den paisnan grandi nos, simplemente, no tin e.
E no ta solamente e recurso, ora nos ta papia di un recurso financiero pero e recurso humano cu ta bay den prepara hende super specializa. Dus, nos ta bezig cu e gap analisis aki, pa nos por yega na un analisis nacional eigenlijk, pa por cera e gapnan aki mas cu ta posible. Pero mi ta kere, en general ta un falta di preparacion structural y mi por bisa cu esaki educadornan na Aruba, enberdad ta haya na scol informacion cu nan mester, y conocimentonan pa casonan cu nos ta considera leve, y pa casonan cu no ta hopi severo den un klas, pero e diversidad cu ta bin ora bo ta papia di un stap manera autism, ta hopi dificil pa bo ta prepara p’e den tur forma, na momento cu bo ta para dilanti klas como educador”, Carolina Span a splica.
El a agrega cu eynan e fundacion ta trahando pa educa e educadornan mas tanto posible; nan a haci diferente tayer di trabao y e aña aki nan ta bay sigui cu esaki. “Pero e ta dificil pa bo haci algo general pa un educador c u, eigenlijk, tin un necesidad hopi specifico, den klas. Dus, ora nos papia di e necesidad aki tambe nos tin cu pensa riba miho comunicacion y samenwerking entre e instancianan concerni”, Carolina Span a señala. Den e siguiente edicion DIARIO ta elabora mas tocante e esfuerzonan aki di e Fundacion.
