Tuma nota di e pasonan cu bo tin di bay haci
ORANJESTAD (AAN): Diamars mainta durante un conferencia di prensa di Departamento di Impuesto, a duna informacion cu e aña aki si a keda cla cu e compania y ta bolbe otorga e plachinan di number cu ta “personalisa”, pues e plachinan cu tin ‘nomber’ riba nan.
Meverly Romano di Departamento di Impuesto, a indica cu durante 2024 tabatin varios automobilista cu a paga pa e plachinan personalisa, pero no por a haya esaki. Pero awor si pa 2025 dentro di poco lo cuminsa entrega e plachinan di nomber aki.
“Awor e aña aki si nos ta cla, y e compania cu ta entrega e plachinan ta cla tambe pa produci nan,” Romano a indica.
Pasonan pa tuma: Segun el a splica, esnan cu na 2024 a paga pa e plachinan aki, tin di haci e siguiente pasonan. Bo tin di acudi na Edificio Principal di DIMP na Camacuri, y acudi na e Balie di Recepcion. (Pues no ta necesario bay den rij na Loketnan di Cashier).
Na e Balie di Recepcion bo ta bay busca un carta, y bo ta hiba e carta aki na e fabrica di plachi, y despues di 3 dia di trabao, bo por acudi na e Edificio di Plachinan na DIMP pa busca e plachi. E plachinan personalisa aki lo wordo entrega solamente entre 3:30 pm y 4:00 pm.
Nan ta wordo entrega te laat atardi, pasobra no por stroba esnan cu tin cita henter dia pa busca nan plachinan.
Na Aruba pa 2024 y 2025, tin 770 plachi personaliza registra.
