Fundacion Anti Droga Aruba ta lansa 'Don’t Drink & Drive Campaign: BAR'

Bo Amigo Responsabel

ORANJESTAD (AAN):  BAR ta e concepto y campaña mas nobo di Fundacion Anti Droga Aruba di no maneha bou influencia di Alcohol. Durante un conferencia di prensa diamars mainta, e fundacion a lansa nan campaña nobo y a probecha pa duna mas detaye.

            Dicon BAR? BAR pa hopi hende ta conoci como un lugar di consumi alcohol, un lugar unda tin ambiente y cu mayoria bes tin alcohol presente.

            Mirando cu FADA a scoge pa drenta un era nobo y un forma mas moderno pa trece concientisacion a pensa ariba tur area con pa yega mas cerca di e comunidad.

            Crea un campaña no ta algo facil y na momento cu e tin cu yega na un grupo grandi di persona den nos comunidad cu ta consumi alcohol e ora mester crea algo “catchy” y moderno cu nan lo tin gana di scucha di dje.

            FADA ta di pensamento cu di tur cos cu kisas tin un luz negativo su tras nos por saca e positivo for di dje. Y pesey diamars a presenta na comunidad di Aruba, BAR. Cu un mente habri y moderno ta presenta BAR.

            E concepto BAR ta para pa Bo Amigo Responsabel, e persona cu no ta bebe alcohol y ta zorg pa na momento cu abo scoge pa “dal dos” lo bo yega cas sano y salvo cune como bo BAR, Bo Amigo Responsabel.

            No ta desconoci cu durante aña y sigur den e temporada cu nos ta aden di Carnaval, tin hopi alcohol ta wordo consumi y esaki ta e motibo tambe cu nos no por a laga aña habri sin crea un campaña cu sigur cu e sosten di comunidad completo di Aruba lo ta un exito total.

            Tur esaki no lo ta posibel sin e ayudo grandi di personanan cu a kere den e campaña desde e prome dia cu nan a scucha e concepto.

            FADA ta expresa un gradicimento special ta bay na Guardian Group cu durante e temporada di Carnaval 71 lo carga e campaña aki en grande. Na SMAC cu ta sostene e campaña BAR den Carnaval 71. Na KPA cu ta apoya y sostene nos campaña di mas nobo. Na Jeon y henter su team pa un concepto unico y pa e jingle cu lo ta un hit sigura. Na tur persona cu a haci e videoclip posibel: Team FADA, RockaBeach Tours, cada un voluntario cu a forma parti di nos videoclip y sin lubida nos producer Dani Cruz cu ta make the magic happen.

            "Aruba nos ta conta cu bo sosten pa nos campaña nobo y nos kier corda bo specialmente den e temporada aki di Carnaval 71 zorg pa abo stel bo BAR, Bo Amigo Responsabel", asina esnan di FADA a finalisa nan presentacion.