Darren Van Ommeren a splica:
ORANJESTAD (AAN) — Darren Van Ommeren a splica, den entrevista cu DIARIO, cu pa loke ta Prins cu Pancho, e tabata hopi bon bishita Diadomingo anochi. “Nos a ranca sali 6.30’or en punto, nos tabata tin un draaiboek bon hinca den otro, y el a core fluent y esaki a bay te mas of menos 10 or y mey cu full e evento a caba.
Nos a elegi Prins cu Pancho e ora ey, y pa loke ta e acogida di bishitante nos a constata cu esaki a crece. Aunke e ta un evento gratis ta bisto cu nos tabata den Entertainment Center, cu tabata parcialmente, basta yen”, Van Ommeren a relata.
El a agrega cu e ta calcula cu tabata tin entre 700 pa 800 persona cu a bin bishita e evento aki y cu tambe a yena SMAC di satisfaccion, cu e pueblo ta bin apoya nos talentonan local.
SECCION PA STOEL:
Darren Van Ommeren a probecha pa informa di biaha, cu tabata tin un disgusto den pueblo cu no tin mag di bin cu stoel.
“Mi kier bisa tur hende cu pa e eventonan di 2025, pa cualkier evento, no di carnaval so, no ta permiti mas pa bin cu stoel ni jugs pasobra e ta un forma di obstaculo, cu no ta coopera cu si algo mester pasa, un emergencia cu mester sali core, e por fungi como un obstaculo, pa sali for di e lugar”, van Ommeren a trece dilanti.
El a agrega cu el a papia cu Brandweer y nan ta ok pa SMAC laga stoelnan drenta pero mester arma un seccion apart pa esaki.
“Nos ta bay arma un seccion pa esaki pa loke ta eleccion di Reina; pero tene cuenta cu e stoel cu ta bin cu ne, mester bay den e seccion ey, no por bay otro caminda.
Dus, nos ta bay arma cabelnan pa e Reinanan, pero stoel no por bay den e cabel. Stoel mester bay den un seccion apart caminda nan ta wordo asigna pa stoel so”, el a subraya. Y mester tene cuenta tambe cu si e espacio yena, no por laga drenta mas stoel pasobra e ta un seccion y semper un seccion ta limita”, Darren van Ommeren a señala.
