15 di Juni: Dia Mundial di Conscientisacion contra Abuso di Adulto Mayor
ORANJESTAD (AAN): Pa honra Dia Mundial di Conscientisacion Contra Abuso di Adulto Mayor cu ta tuma luga cada aña riba 15 di juni, Fundacion Alzheimer Aruba (FAA) ta invita comunidad pa participa den un simposio special cu lo tuma luga dia 14 di juni 2025, un dia prome di e dia oficial, na MFA Santa Cruz.
E simposio aki ta dedica na e tema di “Promove Proteccion y Husticia pa e Victima di Abuso di Adulto Mayor”, y su meta ta pa lanta mas conscientisacion den comunidad tocante e maltratonan cu hende mayor ta enfrenta y kico por haci pa preveni esey.
Detalhes di e evento:
- Fecha: Diasabra, 14 di Juni 2025
- Luga: MFA Santa Cruz
- Ora: 11:00 A.M. – 4:00 P.M. (Inscripcion ta cuminza 10:30 A.M.)
- Idioma: Papiamento
- Entrada: Totalmente gratis
Bao e lema “Tin biaha e unico visibel ta lagrima – No Excuse for Elder Abuse”, ta recorda comunidad cu abuso di adulto mayor ta un realidad cu mester wordo combati. Cada persona tin un rol den e lucha pa defende dignidad y bienestar di nos grandinan.
E actividadnan ta organisa den marco di Resolucion A/RES/66/127 (2011) di e Nacionnan Uni, y lo inclui presentacionnan informativo, dialogo interactivo y recurso pa famia y cuidado.
E poder pa preveni abuso ta den bo man tambe! Pa mas informacion, por tuma contacto cu Fundacion Alzheimer Aruba (FAA).
