Evento di Aruba Lions Club riba Diasabra
ORANJESTAD (AAN): Diasabra awor for di 8:00 am te cu 12:00 pm, lo tin e di dos Feria di Salud na San Nicolas, organiza pa e organizacion social di Aruba Lions Club. E lo tuma lugar na sede di Colegio San Augustin MAVO den Pastoor Hendrikstraat.
Aruba Lions Club lo tey cu tur nan partnernan cu ta yuda haci e feria uno exitoso, incluyendo pa prome biaha presencia di Fundacion ABO.
Segun Diantha Nuesch di Fundacion ABO, nan team na e Feria di Salud lo bay tin posibilidad pa ciudadanonan registra pa diferente programa di screening, programanan preventivo pa chekeo di pecho, di tripa, y chekeo di boca di matriz.
Señora Nuesch a enfatiza, cu pa Fundacion ABO ta un placer pa uni cu e evento di Feria di Salud di Aruba Lions Club, pa asina nan por yega mas cerca di comunidad. Pesey Fundacion ABO ta manda invitacion pa comunidad di Aruba, specialmente pueblo di San Nicolas pa participa. Nan tin profesionalnan pa duna guia, pa duna informacion, debi cu prevencion ta sumamente importante y cu e programanan di screening, por yega hunto na un comunidad mas saludabel.
Fundacion ABO ta spera di por yuda comunidad den e meta pa mehora salud di tur hende.
