Evento di Aruba Lions Club riba Diasabra
ORANJESTAD (AAN): Diasabra awor for di 8:00 am te cu 12:00 pm, lo tin e di dos Feria di Salud na San Nicolas, organiza pa e organizacion social di Aruba Lions Club.
E lo tuma lugar na sede di Colegio San Augustin MAVO den Pastoor Hendrikstraat, schuin otro banda di 88 Snacks.
Aruba Lions Club lo tey cu tur nan partnernan cu ta yuda haci e feria uno exitoso, incluyendo e team Medico di Xavier University mas nan studiantenan cu ta participa y guia e proceso.
Segun Profesor Bonnie McGowan, kende ta ‘Dean of Nursing’ na Xavier University, tambe a uni na e invitacion na comunidad di Aruba pa acudi Diasabra na e Feria di Salud aki.
“Mi lo trece un cantidad grandi di studiante di medicina, y algun Docter medico cu mi, y nos lo tey pa yuda comunidad. Nos ta bay tuma bo presion di sanger, check bo sucu, check bo colesterol, tambe check bo Body Mass Index (BMI).”
Segun Profesor McGowan, di berdad su team lo keda encanta pa mira mas hopi hende posibel acudi na e evento unico aki pa bo controla bo salud na forma gratis. Aña pasa a yuda 150 hende di comunidad, y e biaha aki nan ta spera di lo bay haya mucho mas.
