Edwin Jacobs, Director SVb:
*Esaki como revancha ora nan tin conflicto cu dunador di trabao
ORANJESTAD (AAN) – Director di SVb, Ir. Edwin Jacobs, den su prome parti di e entrevista cu DIARIO a menciona cu nan tin un departamento cu ta controla ora tin sospecho di violacion riba e ley di seguro di malesa y accidente, por ehemplo di dunadornan di empleo cu no ta registra un of mas trahado, na SVb.
El a sigui bisa cu parti di e denuncianan cu SVb ta ricibi ta bin via tips. Jacobs a declara cu tin tips cu ta mustra un poco straño, pasobra tin trahado cu a traha tur tempo sin ta sigura y ora nan ta haya un pleito cu doño di trabao, e ora ey nan ta yama SVb.
Señor Jacobs a señala cu SVb no tey si, pasobra e trahado kier tuma revancha riba un doño di trabao, anto nos ta bay bin na e revancha ey. “No! nos ta serio!” Jacobs a expresa.
El a agrega cu asina cu e trahado a drenta den conflicto y e ta kita, e ta yama SVb despues di podise dos aña sin ta registra, y esaki ta sosode cu regularidad. Y, SVb no ta drenta meymey di conflicto.
Tin hende ta cuminza manda tips ora tin conflicto. “Mi no ta bisa cu nos no ta investiga, pero e no ta e sistema. E sistema ta cu ora bo ta constata cu bo no ta sigura, bo ta manda informacion akinan cu bo ta trahando den e lugar y bo no ta sigura. Nos ta zorg pa nos yega eynan, completamente anonimo, haci nos chekeo”, Jacobs a menciona, y a agrega cu aña pasa a controla 196 dunador di trabao, di 3.600 mas of menos. Pues, SVb ta haci su best pa haci control.
