Frido Tromp a celebra 40 aña di servicio na Kowloon Restaurant

ORANJESTAD (AAN):  Riba 26 di september 2023, Kowloon Restaurant a celebra e di 40 aniversario di servicio di sr. Frido Tromp.  

            Hunto cu su famia, coleganan y gerencia di e restaurant a disfruta di un desayuno hopi ameno caminda a recorda e trayectoria impresionante di Frido den e famia di Kowloon.  Hopi tabata e anectodanan cu Frido hunto cu su coleganan a repasa riba e mainta aki.

            E la conta con antes tabata hopi diferente cu awendia y tambe a recorda varios colega cu el a labora cu nan den pasado, cu awe ta disfrutando di nan pensioen bon mereci. Na mes momento, Frido a duna e coleganan presente hopi conseho valioso cu lo haci nan exitoso durante nan carera.

            Gerencia di Kowloon Restaurant a gradici Frido pa su dedicacion y lealtad durante 40 aña na Kowloon Restaurant.  A subraya cu e ta un ehempel y inspiracion pa hopi colega, pa su forma di atende cu su trabow y pa corda detayenan di cada cliente cu ta laga tur hende sinti special ora cu nan visita Kowloon.

                        A finalisa pidiendo nos bon Dios pa duna Frido hopi aña mas di prosperidad y bon salud, hunto cu su sernan keri y e famia di Kowloon, celebrando 48 aña di existencia.