Politiconan Hulandes ta actua manera DIARIO a adverti
- Gobierno di Aruba mester ta imagen di e union di e pais
- Aruba no por bira bala pa partido Hulandes hinca goal
ORANJESTAD (AAN)- Ora hopi hende ainda no kier a kere, DIARIO a anuncia final di e Gabinete 4 di Mark Rutte y asina fin di e Gobierno cu mester atende cu uno di e asuntonan mas importante for di momento cu Statuut a wordo firma den Reino Hulandes.
DIARIO a indica, cu politiconan Hulandes pa score den un situacion cu tin nan propio porvenir politico na peliger, lo asumi un posicion fuerte contra Aruba pa loke ta trata e exigencia pa supervision, cu a bira condicion pa Aruba haya asistencia financiero.
E parti di inhusticia politico ta bini dilanti pasobra e partidonan Hulandes ta bon na haltura cu di e forma aki nan ta mete cu politica na Aruba pasobra nan ta crea un situacion, cu por haya mal uso di oposicion den e bataya contra gobernacion.
Si Gobierno Evelyn Wever-Croes no a haci un bon trabou, awe no tin problema. Ta e hecho cu el a haci un bon trabou ta habri caminda pa e discucion si ta impone RAFT cu ta supervision pa medio di un decreto di Reino riba cabez di Aruba caminda Gobierno Wever-Croes a percura pa tin un saldo positivo.
Awor palabra ta na Aruba y awor politiconan di Aruba mester duna prueba, cu no ta posicion politico ta conta pa nan pero cu nan ta uni den e causa di Aruba.
Gobierno di Aruba na e momento aki mester ta un imagen di union, cu ta e forsa mas grandi cu Aruba conoce.
Na momento cu mishi cu e union di Aruba por haci y deshaci cu e pais.
E forma cu Aruba a alcansa su Status Aparte tabata basa riba e union den e Pueblo Arubiano.
Na e momentonan aki Gobierno di Aruba mester manda un mensahe cla pa e comunidad di Aruba y duna prueba cu union ta mas importante cu tur otro aspecto den un situacion mundial y sigur den Reino caminda politiconan Hulandes no por uza loke nan mes a permiti pa wordo crea, cu ta e debe nacional, bira arma inaceptabel contra Gobierno Evelyn Wever-Croes cu a hiba Aruba na un maneho responsabel.
Si dia Prome cu September Reino kier un contesta di Gobierno Wever-Croes, awor pa cuminsa Gobierno di Aruba mes como un union y no un ekipo di cada hende cu kier bula na awa segun nan convenencia personal, mester demostra esaki.
DIARIO ta vigila tur loke ta pasa.
Na e momentonan aki politica di Aruba mester di sinceridad y mester di gobernantenan, di Miembronan di Parlamento y di un Pueblo cu un curazon Arubano y no politiconan cu solamente conoce nan color politico y e beneficio personal cu nan por tin den politica.
Na 1983 union a entrega Aruba un triunfo cu lucha sagrado y entrega na e bienestar nacional solamente tabata capaz di entrega.
Awe e lucha cu Gobierno Wever-Croes ta enfrenta ta mes indole cu na 1983 ora Aruba mester a presenta na Conferencia di Mesa Rondo.
Con Aruba lo sigui cana na 2023?
Palabra ta na gobernantenan, na Parlamento cu ta actua na nomber di Pueblo pa dicidi si Aruba ta wordo usa pa partidonan Hulandes haya voto of Aruba lo dicidi pa integridad di Aruba!
