Problemanan regional ta exigi atencion di Aruba pa nan resultado
- Fin di 2023 ta exigi pa bati alarma pa peligernan serio pa pais
ORANJESTAD (AAN)- “2023 durante e pandemia Convid-19 a wordo proclama como e aña cu mundo mester a bolbe normalidad. E realidad ta completamente distinto y e cantidad di problemanan mundial ta sigui aumenta.”
Na palabra informantenan sumamente preocupa pa desaroyonan internacional pero sigur pa desaroyonan cu por tin resultado importante pa Aruba.
Cu pruebanan cla, informantenan a expresa preocupacion pa desaroyonan den e region directo di Aruba debi na por ehempel migracion cu tin impacto enorme riba e cantidad di problemanan cu ta surgi na otro pais.
“Durante e eleccion na Hulanda a bini dilanti con problemanan por wordo importa na paisnan, cu mester brinda solucionnan social na habitantenan di paisnan cu ta bira victima di problemanan na nan pais,”a bini dilanti.
E discusion actual na Hulanda entorno problemanan cu ta mara na migracion, ta marca contenido di hopi advertencia cu DIARIO a lansa continuamente.
Migracion ta uno di e problemanan serio cu ta wordo importa na momento cu tin problema na paisnan, cu ta produci refugiado y tur loke esaki ta encera, a bini dilanti.
Na e momentonan aki dos pais mester wordo tene na vista cu ta Venezuela y Haiti, caminda desesperacion politico ta continua.
Manera informantenan clave ta mustra poco atencion ta wordo dedica dor di tur gremio, pa e resultado cu e situacion den region di Aruba por produci.
A wordo mustra cu na Aruba poco ta wordo papia di e eleccionnan presidencial cu mester tuma lugar na 2024 pa asina na Januari 2025 un presidente nobo presta huramento na Venezuela.
Cu problema por wordo spera sigur ta bini dilanti den e hecho cu Nicolas Maduro a informa cu e no kier ningun representante di Union Europeo presente como observador na e eleccionnan na Venezuela.
Cu e eleccionnan aki ta leu for di normal y regla democratico ta e miedo grandi di opositornan di Nicolas Maduro.
Te ainda un fecha pa e eleccionnan no ta conoci, pero segun Nicolas Maduro lo tin eleccion, loke segun hopi hende lo bay na e sistema cu Nicolas Maduro kier.
Na Venezuela actualmente tin influencia directo di entre otro Rusia y paisnan cu ta sostene e regimen di Nicolas Maduro, cu ta prepara e Conseho Electoral di Venezuela na su forma.
Uno di e personanan cu mester a keda den exterior ta Juan Guaido. Actualmente e ta na Merca despues di a percura pa un espectabulo na Colombia, cu el a tilda di a exigi su persona pa bandona e pais.
Un situacion sumamente tenso ta desaroya den porta di Aruba, cu ta e destinacion di personanan desespera cu ta busca nan salida for di Venezuela.
Un situacion alarmante ta sigui causa preocupacion na Haiti, caminda segun fuentenan di Nacionnan Uni mester trata na recluta por lo menos Dos Mil agente policial, capaz pa enfrenta e bandanan cu ta haci bida na e pais cubri cu pobreza, imposibel,
Nacionnan Uni a mustra cu nan mester di mas ayudo pa por atende cu e situacionm sumamente serio cu tambe ta provoca cu mas y mas persona cu ta biba na Haiti ta busca forma pa bandona e pais y crea un futuro nobo.
“Hamber y violencia ta haci bida imposibel na Hait,”informantenan a indica y nan ta spierta cu esaki tambe lo duna mas motibo pa salida di refugiadonan en busca di un futuro nobo.
Na Hulanda e siman aki a bini dilanti, kico ta e resultadonan pa un pais ora migrantenan bati na porta y e pais no ta capaz pa duna asistencia mas manera e refugiadonan ta pensa.
Segun informantenan na e momentonan aki na Aruba mester di union y colaboracion pa enfrenta situacionnan regional sumamente serio, cu lo afecta Aruba directamente.
Den e proximamo lunanan mester vigila sigur loke ta pasa na Venezuela, cu ta den porta di Aruba y na caminda pa eleccion, cu mester ta na fabor di Nicolas Maduro.
DIARIO lo sigui informa.
