El a bira un sorto di atraco tambe!
ORANJESTAD (AAN): E ta un situacion unda cu cierto ‘chauffeurnan’ riba caya ta sinti cu nan mag di core auto segun nan reglanan. Nan por corda con cu ta, y ningun otro automobilista no mag di hala nan atencion, no mag di zundra nan, bo no mag di ni resona bo pito den nan direccion.
Nan ta bira falso, ta cuminza busca guera, y no ta worry cu nada di regla y fatsoen, y tampoco no ta worry cu nan ta comete esaki den bista di hopi turista den Hotzone na Palm Beach.
Dialuna anochi banda di 10:10 pm, un unidad di Polis di Noord a ser manda na e recien inaugura Embassy Suites riba Irausquin Boulevard pa check un caso di atraco.
Ora cu Polis a yega, agentenan a papia cu e taxista di inicial Z. E taxista Z. a declara cu el a caba di piki 5 turista na Gianni’s Restaurant, y e huespednan aki a pidi pa nan wordo hiba pa Embassy Suites.
Bayendo zuid riba Irausquin Boulevard, na altura di e establecimentonan di Craft y Lola na The Village Mall, tabatin un auto shinishi para mey-mey di caminda y no ta move. Aki e taxista Z. a pita e auto cu ta para su dilanti mey-mey di caminda.
E hendenan cu tabata den e auto shinishi, via nan bentana a rek nan mannan pafo y a mustra nan dede di mey-mey. Despues un di e pasaheronan den e auto shinishi a zwaai un boter di plastico cu awa riba su vehiculo. Poco despues di esey porfin e auto a cuminsa core bay zuid.
Yegando na altura di Divi Phoenix, e taxista Z. a mira e auto shinishi aki para banda di caminda. Ora cu e taxi a pasa bay zuid, e auto shinishi a bin mesora su tras. E manehador di e auto shinishi a yega cerca, pas’e, y haci un brake-check su dilanti y a stop e Taxi.
E porta dilanti banda drechi di e auto a habri y un homber a baha. E homber a bin para na e porta banda drechi di e Taxi y cuminza rek na e man. A resulta cu e Taxi ta core su auto sin lock porta, pasobra e homber a habri e porta facilmente.
E Taxista mientras tanto a saca su smartphone pa graba video, y e tabata grita e homber cu e ta grabando video di dje. E homber aki a bin den su direccion, y cu un solo zwaai di man, el a gara e smartphone di e taxista Z., kit’e for di dje. Unavez cu e tabatin esaki den su man, el a core bay na su auto shinishi, y core bay den e auto.
E bon ta cu e Taxista y tur e turistanan a mira e plachi di number di e auto.
Awor cu e ta sin smartphone, e Taxista a core bay te na Embassy Suites unda el a bati alarma. Polis a ser yama cu a yega mesora, y a bin tende e storia di e caso aki di ‘road rage’ cu a escala na un forma masha mahos y innecesario den bista di turistanan.
Descripcion amplio a ser suministra na Polis di e auto, di e homber cu a asalta nan, di e plachi di number, y di loke a socede. Polis a tuma detaye di tur esaki, y awor nan ta investigando e asunto.
Si abo a mira loke a socede Dialuna anochi, bo ta ser pidi pa yama Tipline di Polis na 111-41 pa duna detaye di esaki.
