ORANJESTAD (AAN): The Truth About Drugs ta un programa di educacion riba uso di droga y alcohol, cu ta dunabo conseho y informacion riba kico droga ta exactamente y kico e substancianan aki ta haci cu bo mente y cu bo curpa.
E ta un programa cu Freewinds a bin cune y Diamars Port Captain di e crusero Freewinds Kenneth Weber den un entrevista cu DIARIO a splica cu e ta yuda Fundacion Anti Droga Aruba (FADA) tambe via foyetonan di informacion cu nan programanan anti droga.
“Hobennan ta haya sa di droga y alcohol for di nan famia, amigonan of esnan cu ta bende droga”.
Esey ta e informacion cu nan ta haya, en bez di haya informacion riba kico di berdad ta e realidad di droga y alcohol, segun Weber.
El a sigui bisa cu ta importante pa nan haya sa e otro banda di medaya, esta e efectonan negativo cu e substancianan aki tin riba bo curpa y mente.
Ta esencial pa tur hende haya e informacion corecto riba kico ta adiccion y con esaki por destrui bida di hende y no solamente tende di amigonan cu ta bisa cu ta great pa uza droga.
“Si un persona haya tur dos banda di informacion, e por haci un evaluacion pa su mes pa determina si di berdad lo ta bon pa cuminza uza droga of consumi alcohol”, segun Weber.
Pa loke ta FADA, Weber a splica cu un biaha mas el a trece foyetonan pa e fundacion, cu informacion actual y relevante riba entre otro e quimiconan cu tin den droga y alcohol y con esakinan ta afecta e mente y curpa di un ser humano.
El a splica cu durante añanan largo FADA a haci uso di e foyetonan aki di informacion, ora cu nan bishita studiante y alumnonan di scol, pa informa hubentud.
