Gobierno nobo a elimina e subsidio pa FCCA
ORANJESTAD (AAN): Manera ta conoci diabierna ultimo, Gabinete Wever-Croes II a haci traspaso oficial na e gobierno nobo di AVP-FUTURO. Despues di e huramentacion e gobierno nobo a bay Parlamento pa asina trata presupuesto 2025 cu a ser traha pa Gabinete Wever-Croes II. E presupuesto aki a wordo adapta pa e gobierno nobo cu algun medida cu lo tin resultadonan hopi negativo pa esnan mas vulnerabel den comunidad.
Parlamentario Evelyn Wever-Croes a indica cu un di e cambionan cu e gobierno nobo a haci riba e presupuesto tin’e hopi preocupa. Esaki ta e eliminacion di e subsidio di un poco mas di 2 miyon florin cu e gobierno anterior a duna FCCA pa asina mantene e prijsnan di huur di cas social abou.
FCCA ta e fundacion cu ta construi casnan social, y ta na unda tur esnan cu ta den necesidad pa un cas por yega aplica pa wak si nan ta bin na remarke. Una bes nan bin na remarke pa un cas, lo wak nan entrada y basa riba esaki, gobierno ta duna un subsidio riba e prijs di huur. Lamentablemente, FCCA a acerca e gobierno anterior indicando di no por sigui mantene e prijs di huurnan abou, y a pidi gobierno pa aumenta e subsidio aki. Esaki ta e 2 miyon y pico cu e gobierno anterior a inclui den presupuesto 2025, cu awor e gobierno nobo di AVP-FUTURO a elimina.
Parlamentario Wever-Croes a expresa di ta sumamente preocupa cu e decision aki di elimina e subsidio pa FCCA, mirando cu debi na esaki, e prijs di huur di casnan social lo bay subi. E gobierno di AVP-FUTURO a papia hopi di yuda esnan mas vulnerabel den comunidad, pero nan accionnan ta varios medida contra esnan mas vulnerabel den comunidad.
“Mi ta lamenta e decision tuma aki, paso e placa tey, nos gobierno a prepara tur cos y tin un surplus di 500 miyon. Mi no por comprende dicon nan lo elimina un gasto cu ta asina necesario pa esnan cu ta wardando riba un vivienda. Cada mama y tata tin derecho di tin un dak riba nan cabes pa nan por lanta nan famia. P’esey, nos a bin cu e decision di duna FCCA un subsidio y awor e Gobierno nobo aki ta bin riba nan prome dia den gobernacion, y ta elimina esaki, creando mas problema pa viviendanan social na Aruba.
Fraccion di MEP no lo para keto y lo sigui busca solucion hunto cu FCCA, Parlamento y Gobierno pa e subsidio yega na FCCA pa asina nan por mantene e prijsnan di huur abou. Si FCCA hay’e forsa pa subi e prijsnan di huur, esnan cu lo sufri e consecuencianan aki ta esnan mas vulnerabel den nos comunidad. Comunidad completo por confía cu ami y mi fraccion lo sigui lucha pa e FCCA haya e subsidio aki” Parlamentario Wever-Croes a indica.
