Apertura di Exposicion di Fundacion Crea Arte den edificio di KvK dirigi pa Miriam de l’Isle

Diesseis hoben ta expone nan obranan: --- ORANJESTAD (AAN)—Diabierna ultimo, a tuma lugar den e edificio di Camara di Comercio, un interesante exhibicion di Fundacion Crea Arte.

E artista plastico y docente di arte, Miriam de l’Isle, a expresa cu KvK a duna e fundacion e oportunidad pa exhibi nan obranan, specialmente esnan traha pa su alumnonan. E ta docente di muchanan den edad di 6 te 18 aña.

Den total nan tin un average di 40 obra, y ta un exposicion cu lo bay dura henter un aña, kiermen di October 2021 te October 2022.

Den e transcurso di e otro aña lo bin algun cambio. E expo aki ta consisti di obranan abstracto, kiermen sin mucho realismo, inspira den tres artista famoso. E obranan ta traha riba canvas.

Miriam ta un artista reconoci, pero e no ta gusta mucho fanfare sino cu e ta traha trankil. E ta docente desde aña 2003. Aworaki tin un total di 16 alumno cu ta presentando nan obranan.  Miriam a expresa cu arte mester wordo inculca den e mucha for di chikito pasobra den edad adulto e persona no tin mucho conocemento y tampoco suficiente tempo pa dedica na arte. El a haci un invitacion na esnan interesa den arte pa bin wak e exposicion na KvK, entrada ta liber.