Parlamentario Hendrik Treveden ta splica:
ORANJESTAD (AAN) – Parlamentario Hendrik Treveden, lider di fraccion, a menciona den conferencia di prensa cu fraccion di MEP, hunto cu tur e otro fraccionnan den Parlamento, ta preparando su mes pa e Tripartite.
Siman pasa nan tabata tin un presidium hunto cu Sint Maarten y Curacao, y den e presidium aki nan a logra pa pone, concretamente, e puntonan di agenda. Y den e puntonan di agenda cu nos a pone dilanti pa Sint Maarten, nos ta bay continua riba e problema cu nan tin den e area di salud publico (Publican Crisis), y di eynan nos lo sigui mira e desaroyonan cu tin, pasobra Sint Maarten, manera nos sa, ta sufri di problemanan di horcan, pero danki Dios e aña aki nan no a ricibi ningun horcan cu por a afecta nan, y ban spera cu nan por cera aña asina tambe.
Pero e horcannan cu a pasa anteriormente, a destrui gran parti di e hospital, aeropuerto, y unda cu nan tin dificultad pa por a drecha esakinan bek, y por a duna cuido den nan pais, pero tambe paisnan manera Saba, Sint Eustatius, cu ta bin busca ayuda medico eynan.
Pa Curacao, riba e agenda di tripartite, nan ta bay continua riba loke ta trata e “Fiscale Wetgeving” unda cu nan kier mira un cambio den esaki, y sigui mira e desaroyonan. “Nos discusion ta bay ta riba e temanan aki, y pa Aruba nos a trece como punto di agenda “E deficit democratico den Reino”.
Si bo puntra bo mes pakico e tripartite ta asina importante, mi kier djis remarca un punto cu nos a logra den tripartite. Tripartite ta e grupo di paisnan Aruba, Curacao y Sint Maarten den Reino, cu lo bin hunto prome cu nan bay sinta cu Pais Hulanda na mesa, y mi ta di opinion cu e tres paisnan aki bisiña, cu ta compronde su cultura, tradicion y problemanan nacional miho cu e Hulandesnan, tin cu bini hunto constantemente, pa asina fortifica e lazonan, pero tambe bin den un direccion conhunto, pa por logra tin resultadonan concreto.
Y locual cu nos a logra, na mi parecer, den e temponan cu a pasa cual ta hopi importante, ta cu nos por a cambia e Ley di COHO, un rijkswet pa bira un ‘onderlinge regeling” cu ta conta pa tur tres pais den Reino, cu na mi opinion e paisnan den Reino a sali miho, di e situacion aki”, Parlamentario Treveden a señala.
